Kontxan ohorezko txandan arraun egiteko aukera barik geratu da Ondarroa
Ondarroak zazpigarren amaitu du Kontxako Banderaren lehen jardunaldia. Urdaibai, Donostiarra eta Kaikugaz batera ariko da txandan.
Ondarroa Kontxa. Argazkia: Ondarroako Kirolaren Leihoa Sailkapen estropadarik onena egin ostean, Kontxako Bandera irabazteko aukerarik barik geratu da Ondarroa. Gizonezkoen lehian Antiguako Ama-k zazpigarren amaitu du lehen jardunaldia, irabazlearengandik 30 segundo eta 42 ehunenekora amaituta lanak. Hala ere, ametsa beteta pozik daude ondarrutarrak. Zaleek, esaterako, sekulako harrera egin zieten atzo [irailak 1] arraunlariei arrapalan.
Bandera datorren domekan [irailak 8] erabakiko bada ere, eta lehen jardunaldiko denborak ikusita, Hondarribiak edo Oriok dituzte bandera irabazteko aukerarik handienak. Hondarribiako trainerua nagusi izan zen lehen jardunaldiko bigarren txandan. Nagusitasun osoz irabazi zuten euren txandan (19.19,88), eta Orio lehenengo txandako irabazlearen aurretik amaitu zituzten lanak. Hala, 5,55 segundoko errentarekin ekingo dio bigarren jardunaldiari Ama Guadalupekoa-k.
Bigarren txandan Hondarribia eta Zierbena parez ibili ziren joanekoan, baina ziaboga bikaina eginda, itzuleran Zierbena (14 segundora), Donostiarra (23 segundora) eta Ondarroa (30 segundora) atzetik laga zituen Ama Gualupekoa-k.
Oriok ere estropada ederra egin zuen lehen txandan. Santurtziko taldeagaz lehia ikusgarria eduki zuen, aldea bi bat segundokoa ere izan zen, baina azkenean talde horiak abantailari eutsi, eta itzuleran erritmoa bizituta Sotera-k baino ia lau segundo arinago amaitu zuten lehia. Atzetik helmugaratu ziren Urdaibai (13 segundora) eta Kaiku (48 segundora).
Lehen jardunaldia eginda ohorezko txanda Hondarribiak, Oriok (5,54 segundora), Santurtzik (9,12 segundora) eta Zierbenak (14,94 segundora) jokatuko dute. Aurreko txandan, berriz, Bermeo (19,04 segundora), Donostiarra (23,30 segundora), Ondarroa (30,42 segundora) eta Kaiku (56,64 segundora) ariko dira nor baino nor azkarrago.
Eguneko bitxikeria Ondarroako arraunlariei gertatu zitzaien. Estropada amaitu eta atseden hartzen ari zirela, trainerua hondartzara bultzatu zuten itsasoaren indarrak eta korronteak. Arraunlariek ontzitik irten, eta bultz egin ostean, itsasora itzuli zuten.
Emakumezkoen lehian, berriz, ezusteko gutxi egon zen. Txiki trainerua izan zen lehenengoa; Arraun Lagunak baino 6,62 segundo arinago amaitu zituzten lanak. Hala ere, ezer ez dago erabakita; lehia ziurtatuta dago hurrengo jardunaldirako. Ohorezko txandan Orio, Arraun Lagunak, Hibaika eta San Juan ariko dira. Lehen txandan, berriz, Hondarribia, Riveira, Donostiarra eta Zumaia.
