Indartsu hasi dira Mutrikuko Samikolla auzoko jaiak
Txupin jaurtiketa eta brindisarekin eman diete hasiera jaiei Mutrikuko Samikolla auzoan. Goizaldera arte luzatuko da jaia bertso musikatu, kontzertu eta erromeriarekin.
Samikollako jaietako auzo bazkaria. Auzotarren ilusio, gogo eta ekimenari esker geroz eta indartsuago bihurtzen ari dira Mutrikuko Samikolla auzoko jaiak. Gaur [irailak 7] ere goizetik hasi da giro ona. Buruhandi eta erraldoien kalejirarekin estreinatu dute egitaraua eta ume eta helduek bete dute plaza. Orain arte, 13:00ak aldera irekitzen zuten txosna, baina 11:00ak alderako geroz eta jende gehiago hurreratzen dela eta, aurten aurrerago zabaltzea erabaki dute. Hala, San Nikolas Santuaren egunaren aurreko zapatuko ospakizuna egun osoko jai bihurtu da.
Eguraldia lagun izan dute gaurkoan, eta horrek ere izan du eragina. Hala ere, Samikollako Jai Batzordea urtez urte osatzen eta handitzen joan den egitarau oparoak ere badauka horretan zerikusirik. Ume, gazte eta helduak eduki dituzte kontuan, denen gustukoa izateko.
13:00etan bota dute jaien hasierako txupinazoa eta ohiko brindisa ere egin dute San Nikolas ermita aurrean. Eguerdian, berriz, 50 lagun inguru elkartu dira auzo bazkarian. Hasierako urteetan auzotarrek eurak egiten zuten bazkaria, baina jaia handituz joan ahala, zereginak ere bai, eta sukaldariak hartzen dituzte orain horretarako. Iaz bezala, paella bazkaldu dute aurten ere, eta oilaskoarekin eta postre ederrarekin osatu dute otordua.
Bertsoak eta musika. Goizeko puzgarriek libre utzitako lekua hartuko dute arratsaldean zezen txiki eta pottokek. Eta ondoren, bertso musikatu indartsua egongo da Jon Maia, Beñat Gaztelumendi, Miren Amuriza eta Onintza Enbeita Bizkaiko txapeldunarekin. Musikariak, berriz, Gari eta Ixak izango dira eta gai jartzailea Haritz Casacal.
Errietan talde mutrikuarraren kontzertuarekin eta Zirkiñik bez taldearen erromeriarekin luzatuko da gaua goizaldera arte. Samikollako Jai Batzordekoek azaldu dutenez, Errietan taldeak estreinako kontzertua eman zuen joan den urtean Samikollako jaietan, eta izandako harrera ona ikusita, aurten ere bertan egongo dira. “Talde ezberdinetan aritutako musikariak dira, eta harrera oso ona dute herrian. Iaz ere oso gustura geratu ginen eskaini zuten kontzertuarekin”.
10. urtea. 1946 urtean berriztu zutela ermita jakitera eman dute auzotarrek. Ordutik, irailaren 10ean, San Nikolas Eguna ospatu dute auzoan, baina jai zabalagoa egin asmoz, Samikollako Jai Batzordea (SJB) osatu zuten orain dela 10 urte, eta ordutik, San Nikolas santuaren egunaren aurreko zapatua ere festa eguna bihurtu dute. Azken urteetan, gazte gehiago batzen joan dira jai batzordera eta, azpimarratu dutenez, bultzada horrek eragin du jaia indartzea.
Samikollako jaiak autogestioz funtzionatzen duten jaiak direla ere azaldu dute jai batzordekoek. “Zozketa batekin eta barran ateratzen dugunaz ordaintzen ditugu”. Auzotarren borondatearekin hasi eta apurka-apurka bidea egiten joan dira azpiegiturak ere hobetuz.
Santuaren eguna. Azaldu bezala, gaurko ospakizunak martitzenean [irailak 10] izango du jarraipena. 11:00etan meza egongo da ermitan eta ondoren, omenaldia eta salda eta txorizoa. Urtero, auzotar bat omentzen dute san Nikolas egunean, baina ezustekoa izaten da.
