300 bat igerilari batuko ditu Mutriku eta Deba batuko dituen Flysch Beltza itsas zeharkaldiak
Proba zapatu [irailak 21] goizean egingo dute. Parte hartzaileek Saturraran hondartzatik edo Mutrikuko moilako arlanpatik irtetzeko aukera edukiko dute.
Eibar Igerixan Kirol Klubak antolatuta, VI. Flysch Beltza igeri zeharkaldia jokatuko da zapatuan [irailak 21] . Euskal Kostaldeko Geoparkearen flyscharen itsasbidea jarraitu beharko dute urtero proban parte hartzen duten 300 bat igerilarik. Hain zuzen ere, Mutriku eta Deba batuko ditu igerian itsas zeharkaldiak.
Partaidetza ahalik eta zabalena batzeko asmoarekin, bi ibilbide proposatu dituzte antolatzaileek. Alde batetik, Saturraran hondartzan hasi eta Debarako Santiago hondartzaraino doan 6.500 metroko ibilbide luzea egiteko aukera egongo da, eta, bestetik, Mutriku portuko arlanpa eta Debako Santiago hondartza batuko dituen 3.000 metroko ibilbide motza. Neoprenoaren erabilera derrigorrezkoa izango da proba luzean, eta borondatezkoa laburrean.
Ibilbide luzea, asko jota, hiru ordutan egin beharko da. “Hasi eta bi ordura anoa postutik pasa ez diren edo gehienezko hiru orduak bete eta gero Debako hondartzara ailegatu ez diren parte hartzaileak jaso egingo dira”. Ibilbide motza, asko jota, bi ordutan egingo da. “Gehieneko bi orduak bete eta gero Debako hondartzara iritsi ez direnak jaso egingo dira”.
Proba luzea 10:00etan hasiko da Saturraranen, eta motza, berriz, ordubete beranduago Mutrikuko moilan. Proba hasten den tokietara joateko Debatik autobus zerbitzu berezia egongo dela aurreratu du antolakuntzak. Parte hartzaileek txanoak eta txipak proba egunean bertan jaso ahal izango dituzte 07:30etik aurrera, Debako hondartzan. “Bi irteerak baino ordu erdi lehenago informazio saio labur bat egingo dute, arauak gogorarazi eta egon daitezkeen zalantzak argitzeko”.
Antolatzaileek gogorarazi dutenez, proban adin nagusiko edozeinek parte hartu ahal izango du. “14 urtetik gorakoek ere parte hartu ahal izango dute, baina gurasoen edo legezko tutorearen baimena eta proba egiteko gaitasun fisikoa dutela baieztatzen duen ziurtagiria beharko dute”.
