Lehor igaro dute San Jeronimo eguna Mutrikuko Mijoako auzotarrek
Beste urte batez, San Jeronimo ermita ondoko jai eremua jai gosez egon diren herritarrez bete da.
Asteburuko ekimenak atzean utzita, gaur [irailak 30], jaietako egun azken eguna ospatu dute Mutrikuko Mijoa auzoan:San Jeronimo eguna. Eta jaietako egun handian euria egitea ohikoa baldin bada ere, eguzkipean ospatu dute eguna, herri esaerak dioenaren aurka.
Mutrikuarrek ezeze, inguruko herritarrek ere asko estimatzen duten eguna izaten da San Jeronimo eguna. Mijoako auzotarrekin batuta, giro ezin hobean ospatu dute eguna. Urteroko hitzorduari hutsik egin gabe, jende asko batu da eguerdian egin duten mezatan. Ermita erortzeko zorian dagoela eta, ondoko zelaian egin dute ia ordubeteko elizkizuna. Ondoren, auzoko gaztetxoek herri kirol saioa eskaini dute, bertaratu direnek txosnan eztarriak bustitzen eta gosea asetzen zuten bitartean.
Auzoko gaztetxoak lokotx batzen, txinga eramaten, giza proban, trontzan eta sokatiran aritu dira. Helduek ere animatu dira, eta hiru tiraldi egin zituzten sokatiran plazan batutakoen txalo eta animo artean. Erakustaldia amaitu bezain pronto, bertaratuek txapel eta aitzur jaurtitzen duten abilezia erakusteko aukera eduki dute alboko zelaian. Hamalau parte hartzaile aritu dira ekinean bigarrengoz egin duten txapelketan. Txapel jaurtiketan markarik onena Gorka Arreitunandiak lortu du (31 metro). Aitzurra jaurtitzen Gotzon Arrieta izan da indartsuena (23,40 metro).
