Mutriku eta Deba arteko GI-638 errepidea guztiz itxiko dute asteon, ordu tarte batzuetan
Martitzenean, eguaztenean eta eguenean [urriak 1, 2 eta 3] 10 minutuko itxialdiak egingo dituzte, 10:30ak eta 11:30ak eta 18:30ak eta 20:00ak bitartean. Barikuan, ostera, 10:30etik 11:30ak bitartean egingo dira 10 minutuko mozketak.
Mutriku eta Deba arteko GI-638 errepideko lanek aurrera jarraitzen dute. Momentu honetan Alkoleako tunelean ari dira lanik handienak egiten. Tunela egiteko, baina, leherketak egin behar dituztela esan dute. Ondorioz, asteon, ordu tarte batzuetan errepidea guztiz itxiko dutela jakinarazi dute.
Zehaztu dutenez, martitzenean, eguaztenean eta eguenean [urriak 1, 2 eta 3] 10:30etik 11:30era eta 18:30etik 20:00etara 10 minutuko mozketak egingo dituzte. Barikuan [urriak 4], ostera, mozketak 10:30etik 11:30era egingo dira. Mozketa horiek egiten direnean errepidea guztiz itxiko dutela ohartarazi dute. “Ezin dugu tarte bakoitzeko ordu zehatza zehaztu, lehergaien horniketaren eta leherketaren prestakuntzaren araberakoa izango delako”.
