Miren Amurizaren 'Basa' eleberriagaz hasiko du ikasturte berria Ondarroako Liburuen Amuak egitasmoak
Bost liburu aukeratu dituzte hurrengo hilabeteetarako. Lehen hitzordua urriaren 25erako iragarri dute.
Ondarroako Udalak antolatzen duen Liburuen Amuak ekimenaren aurtengo ikasturteko eskaintza prest dago. Bost liburu aukeratu dituzte hurrengo hilabeteetarako. Ohi modura, urritik maiatzera bitartean hilabeteko azken zapatuan elkartuko dira irakurzaleak Txomin Agirre udal liburutegian, Joxe Mari Urteagaren gidaritzapean.
Urriaren 25ean hasiko du ibilbidea egitasmoak, eta urtero legez, saioek bi orduko iraupena izango dute: 10:00etatik 12:00etara. “Giro lagunkoian liburu bakoitza aztertzen dute eta gaiari buruz solasten dira”. Udal ordezkariek azpimarratu dutenez, Liburuen Amuak “liburu jakin batzuei buruz berba egiteko espazioa da” eta irakurtzeko zaletasuna duen edonori zabalik dago.
Lehen saiorako Miren Amurizaren Basa eleberria aukeratu dute. Lehen saioa, baina, urriaren azken zapatuan egin ordez, urriaren azken barikuan egingo dutela aurreratu dute. Eta tokia eta ordua ere ezohikoak izango dira kasu horretan. Kofradia Zaharrean egingo dute saioa, 19:30ean hasita.
Gainontzeko saioak, ohi modura, udal liburutegian egingo dira, zapatu goizetan. Azaroaren 30ean izango da hurrengo hitzordua; Alberto Martinez de la Cuadraren Nire amaren autografia landuko dute irakurzaleek. Gabonetako etenaldia egin ostean, otsailaren 29an egingo dute hurrengo saioa. Iñigo Aranbarriren Munduko tokirik ederrena liburuari buruz jarduteko aukera egongo da. Martxoaren 28an, berriz, Miren Agur Meaberen Hezurren erretura eleberriari buruz ariko dira. Ikasturteko azken saioa maiatzaren 30ean egingo dute. Friedrich Dürrenmatt-en Epailea eta haren borreroa izango dute mintzagai.
Gogorarazi dutenez, saioetan parte hartu ahal izateko aldez aurretik izena ematea beharrezkoa izango da. Horretarako bi bide daudela iragarri dute: alde batetik udal euskara zerbitzura deitu (94-683 36 68a) edo mrey@ondarroa.eus posta elektronikora idatzi daiteke edo, bestetik, Txomin Agirre Udal liburutegira deitu (94-683 33 43) edo liburutegia@ondarroa.eus posta elektronikora idatzi.
