Euskal Herriko Bigarren Mailako Aizkora Txapelketaren finala jokatuko du Aratz Mugertzak
Ugaitz Mugertza, berriz, lehen mailako finala jokatzeko aukerarik gabe geratu da.
Euskadiko Herri Kirol Federakundeak antolatuta, Euskal Herriko aizkora txapelketen kanporaketak jokatuko dituzte asteburuan. Domekan [urriak 6], esate baterako, bigarren mailako txapelketaren kanporaketa jokatu zuten Etxarri-Aranazko pilotalekuan. Aratz Mugertzak hirugarren postuan amaitu zituen lanak. Hala, urriaren 19an, 18:00etan, Altsasuko Burunda pilotalekuan jokatuko den finalean ariko da. Antolatzaileek iragarri dutenez, Atsasuko lehen bi sailkatuak maila nagusira igoko dira zuzenean.
Aratz Mugertza, 2. mailako kanporaketan aizkoran. Argazkia: Kirru / Egursport
Bigarren mailako kanporaketan hamabi aizkolarik parte hartu zuten. Parte hartzaileek hiruna kanaerdiko, 60 ontzako bana eta oinbiko bana moztu behar izan zituzten, eta mutrikuarrak 15 minutu eta 53 segundo behar izan zituen lanak amaitzeko. Lanak amaitzen lehenengoa Juan Jose Lopez Azpilikueta nafarra izan zen; 15 minutu eta 7 segundotan amaitu zituen lanak. Lopez Azpilikuetarekin batera, honakoen aurka jokatuko du finala Mugertza III.ak: Jon Irazu, Jose Antonio Etxeberria, Eloy Corchero eta Arkaitz Jauregi.
Zapatuan [urriak 5], berriz, lehen mailako kanporaketa jokatu zuen Ugaitz Mugertzak, Gasteizko Foruen Plazan. Norgehiagokan 11 aizkolarik parte hartu zuten, eta mutrikuarra finala jokatzeko aukerarik gabe geratu da, 30 segundogatik.
Ugaitz Mugertza lehen mailako kanporaketan parte hartzen. Argazkia: Ibon Errazu
Aizkolariek seina pago enbor moztu behar izan zituzten (bina kanaerdiko, bina 60 ontzako eta bina oinbiko). Mugertza II.ak zortzigarren amaitu zituen lanak, 21 minutu eta 48 segundoko denborarekin. Mutrikuarrak ondo baino hobeto hasi zuen lehia, baina laugarren enborra moztea nahi baino gehiago kostatu zitzaion, eta hortxe finalean parte hartzeko aukera guztiak galdu zituen.
Kanporaketako denborarik onena Iker Vicentek (18:11) egin zuen, eta haren atzetik sailkatu ziren, hurrenez hurren, Mikel Larrañaga, Julen Alberdi, Iñaki Azurmendi, Eneko Otaño eta Jon Rokondo. Sei kirolari horiek urriaren 27an Gasteizen jokatuko den finalean izango dira.
