Elkarretaratzea egin dute Ondarroan, Altsasuko gazteei Gorenak ezarritako zigorrak salatzeko
Alamedan batu direnek Altsasuko zazpi gazteei babesa adierazi diete eta Gorenaren erabakia salatu dute. Udal gobernuak ere bat egin du elkarretaratzeagaz.
Espainiako Auzitegi Gorenak atzo [urriak 9] jakinarazi zuen Altsasuko gazteen aurkako epaia, eta zigorrak murriztu badizkiete ere, espetxean jarraitu beharko dute; epaileak hiru urte eta erdi eta bederatzi urte eta erdi arteko zigorrak ezarri dizkie 2016ko urriaren 15ean herriko taberna batean Guardia Zibil batzuekin eta euren bikoteekin izandako iskanbila baten ondorioz. Agenteen kontrako atentatua, lesioak, desordena publikoak eta mehatxuak leporatzen dizkiete.
Ebazpena ezagututa, preso dauden zazpi gazteak aske gera daitezela exijitzeko elkarretaratzea egin dute gaur [urriak 10] Ondarroako Alamedan. Jendetza bertaratu da agerraldira. Alamedan batu direnek gazteei babesa adierazi diete eta Gorenaren erabakia salatu dute Ez dugu onartzen absoluzioa ez den beste epairik. Altsasukoak aske! lelopean egin den protestagaz.
Udal gobernuak ere bat egin du elkarretaratzeagaz. Zunbeltz Bedialauneta Ibaibarriaga alkateak babes osoa eskaini die Jokin Unamuno, Oihan Arnanz, Adur Ramirez de Alda, Jon Ander Cob, Julen Goikoetxea, Aratz Urrizola, Iñaki Abad eta Ainara Urkijori, euren etxekoei, lagunei eta Altsasuko herriari: “argi daukagu gazte hauek euskaldunak beharrean beste nonbaitekoak izan baziren zigorra ez litzatekeela berdina izango!”.
Bedialaunetak gaineratu duenez, “konponbiderako garaia den honetan” Euskal Herriaren aurkako erasoa da atzo kaleratutako epaia; eta elkarbizitzarako “beste oztopo bat” dela berretsi du. “Zigorrak gehiegizkotzat jotzen ditugu, eta gaueko liskar baten ostean antolaturiko muntai polizial baten eraginez gazteak espetxeratzea gehiegikeria da; ez dugu absoluzioa ez den beste epairik onartzen”.
Urriaren 26an, bestalde, Iruñean elkarretaratzera deitu dute Altsasuko Gurasoek eta Altsasukoak Aske plataformako kideek.
