Elkarretaratzeak egin dituzte Lea-Artibain eta Mutrikun ere, Kataluniako buruzagi independendistei ezarritako zigorren aurka
Ondoko herrietan egin dituzte protesta ekintzak: Aulestin, Berriatuan, Lekeition, Markina-Xemeinen, Mutrikun eta Ondarroan. Elkarretaratze zaratatsuak egin dituzte.
Espainiako Auzitegi Gorenak espetxe zigorra ezarri die Kataluniako 2017ko urriaren 1eko erreferendumagatik epaitu dituen bederatzi buruzagi independentistari. Behin-behinean espetxean zeudenak dira kartzelara zigortu dituenak. Beste hiru, berriz, desobedientziagatik zigortu dituzte, eta, beraz, ez dira espetxera joango. Epaia jakin orduko, Gure Esku herri dinamikak elkarretaratzeak deitu ditu herriz herri. Lea-Artibai eta Mutrikuko herri dinamika taldeek ere gaur [urriak 14] kalera ateratzeko deia egin diete herritarrei; elkarretaratze zaratatsuak egin dituzte.
Ondoko herrietan egin dira mobilizazioak:
- Aulesti: 20:00etan, plazan.
- Berriatua: 19:00etan, kioskoan.
- Lekeitio: 20:0etan, udaletxeko eskaileretan.
- Markina-Xemein: 20:00etan, udaletxe aurrean.
- Mutriku: 19:00etan, Goiko Plazan.
- Ondarroa: 20:00etan, Zubi Zaharrean. Udalak ere deialdiagaz bat egin du.
Berriatuan egin duten mobilizazioa
Berriatuarrak, kioskoan.
Lekeitioko elkarretaratzea. Argazkia: Lekitxoko Gure Esku
Ondarroako elkarretaratzea.
Mutrikuarrek manifestazioa ere egin dute.
Mobilizazioak deitzeaz batera, horietan parte hartuko duten herritarrei zarata egiteko tresnak eta esteladak eramateko dei egin diete. Elkarretaratzeak Erreferenduma ez da delitua. Askatasuna lelopean egingo dira.
Matxinada baztertu, eta sedizio delituagatik zigortu ditu Auzitegi Gorenak bederatzi horiek. Zigor handienak Oriol Junqueras Kataluniako presidenteorde kargugabetuari eta Generalitateko kontseilari zirenei ezarri dizkie. Espetxe zigorrarekin batera, inhabilitazioak ere ezarri ditu, eta diru publikoaren erabilera bidegabearengatik ere zigortu ditu Junqueras, Raul Romeva, Dolors Bassa, Jordi Turull, Jordi Sanchez, Jordi Cuixart eta Carme Forcadell.
Fiskaltzak eskatua zuen akusatuei hirugarren gradurik ez ezartzeko zigorraren erdia betea izan arte, baina Gorenak atzera bota du fiskalaren eskaera, eta ez du halako baldintzarik jaso ebazpenean. Beraz, zigorraren laurdena betetakoan atera ahal izango dira kalera. Epaitegiak zehazten du hark ezin dituela aurrez debekatu espetxe zaintzak har ditzakeen erabakiak, baina ohartarazten du, halaber, berea izango dela azken hitza espetxe onurei dagokienez.
