Markina-Xemeingo Agarrek irabazi du Aulestiko V. Kinttopeko Zaldi-Mando Txapelketa
Herriko probalekuan lehiatu zuten domekan [urriak 13] eta astelehenean [urriak 14] txapelketa, eta 55 untza egin zituen garaileak.
Agarre baserriko ordezkariak eta Jone Ansotegi Aulestiko alkatea. Argazkia: EgurSport HK 55 untza eginda, Markina-Xemeingo Agarrek (Markina-Xemein) irabazi du Aulestiko V. Kinttopeko Zaldi-Mando Txapelketa. Domeka arratsaldean [urriak 13] eta atzo iluntzean [urriak 14] herriko probalekuan lehiatu zuten proba, eta bost parte hartzaile aurreikusten bazituzten ere, Aulestiko Ibekohondo lesionatu egin zen eta ezin izan zuen proba egin.
1050 kiloko Aulestiko Harri Barriagaz ekin zioten domekan txapelketako lehen saioari. 18:00etan zuten hitzordua Aitor Alzaaren (Aulesti) eta Gargartza Elkartearen (Laukiz) zaldiek. Aurretik ordea, abereen pisaketa egin zuten. 534 kilo pisatu zituen lehenak, eta 558 kilo bigarrenak. Bi zaldien pisuen arteko aldeak ondoren etorriko zena aurreratu zuten. Izan, ere Aitor Alzaaren zaldiak 26 untza pasatxo besterik ez zituen lortu, eta indar gehiagorekin lan eginda, txapelketa irabazteko faborito bilakatu zen Garagatza Elkartearen zaldia; 53 untza eta 4.90 metrotan utzi zuen erronka.
Atzo, 21:00etan, Agarreren eta Fermin Santamariaren (Guriezo) zaldiek parte hartu zuten bigarren saioan. Lehenak 571 kilo pisatzen zituen, eta abereak bizi-bizi egin zuen lan. Aurreko eguneko marka hobetu zuen (55 untza), eta txapelketa erabakita utzi zuen. Bestalde, Santamariaren zaldiak, 522 kilogaz, 39 untza 3/4 eta 0.12 metro egin zituen.
Irabazleari 650 euro eta Iluntzar tabernak emandako manta eman zioten opari legez. Bigarren sailkatuak 550 euro jaso zituen, hirugarrenak 500 euro eta laugarrenak 450 euro.
Sailkapena:
1.- Agarre (Markina-Xemein) 55 untza
2.- Garagartza Elkartea (Laukiz) 53 untza eta 4.90 metro
3.- Fermin Santamaria (Guriezol) 39 untza 3/4 eta 0.12 metro
4.- Aitor Alzaa (Alzaa) 26 untza eta 0.92 metro
5.- Ibekohondo (Aulesti) –
