Donostiako manifestaziora joateko autobusak antolatu dituzte
Zapatuan [urriak 19] Markina-Xemeinetik zein Lekeitiotik (15:30ean), eta Ondarroatik zein Mutrikutik (16:00etan) irtengo dira autobusak. Aurretik izena eman behar dute bizilagunek herrian ahalbidetutako guneetan.
Astelehenean Ondarroan egin zuten elkarretaratzea. Espainiako Auzitegi Gorenak astelehenean [urriak 14] ebatzi zuen 2017ko urriaren 1eko erreferendumagatik epaitutako bederatzi buruzagi independentisten aurkako epaia, eta Gorenaren erabakia jakin orduko, Gure Esku herri dinamikak elkarretaratzeak deitu zituen herriz herri. Horrez gain, zapatu honetan (urriak 19) manifestazioa egingo dute Donostian (17:30), eta Lea-Artibai eta Mutrikutik autobusak antolatu dituzte bertara joateko.
- Markina-Xemeindik 15:30ean irtengo da autobusa, baina aldez aurretik izena eman beharko dute herritarrek. Goizetan udaletxean egongo da horretarako aukera, eta arratsaldeetan Correos zaharrean (17:00-20:00). Azken eguna ostiral eguerdia izango da.
- Lekeition ordu berean aterako da autobusa, Mandaskatik. Izena Guzurmendi tabernan eta Aralde liburudendan eman daiteke.
- Ondarroatik eta Mutrikutik, bestalde, 16:00etan abiatuko da autobusa. Ondarroan, Kuriken, eta Alai eta Amarratza tabernetan eman ahal dute izena; autobusa Zaldupe zubitik aterako da. Mutrikun, aldiz, biribilgunetik abiatuko dira Donostiara, eta izena Zubixa, Zubiaram eta Bare Bare tabernetan eman daiteke.
Manifestazio zaratatsua. Gorenak bederatzi eta hamahiru urte arteko espetxe zigorrak ezarri dizkie behin-behinean espetxean egon diren buruzagi independentistei, matxinada baztertu eta sedizio delitua egotzita. Ezgaitu ere egin dituzte. Desobedientziagatik zigortu dituzte espetxetik kanpo egon diren beste hirurak.
«Epai bidegabea eta haren ondorio larriak» salatzeko Donostiara joateko deia zabaldu du Gure Eskuk. Antiguan hasi eta Bulebarrean amaituko dute manifestazioa, Erreferenduma ez da delitua. Askatasuna lelopean. «Larrialdi demokratikoaz ohartarazteko» txilibitu horiak eramango dituztela jakinarazi dute. Ibilbide osoan zehar eskuratu ahalko dituzte txilibituak herritarrek.
Horrez gain, Ondarroako Zubi Zahar ikastolak deialdiekin bat egin duela jakitera eman du, eta barikuan [urriak 18] 16:30etik 17:00etara, ikastola aurrean elkarretaratzea egingo dute. Aulestiko Udalak ere, adierazpen instituzionala egingo du gaur, 20:00etan.
