Hamar ekintza dakartza Ondarroako Literatur Amuak jaialdiak
Euskal sorkuntza protagonista izango den galdu ezinezko hainbat hitzordu dakartza literatura, euskara eta ikus-entzunezkoak uztartzen dituen Literatur jaialdiak urriaren 25etik azaroaren 3ra.
Ezkerretik eskuinera, Ana Urkiza, Leire Bilbao, Xabier Mendiguren, Arantza Atxurra euskara zinegotzia eta Maite Rey udal euskara teknikaria, Literatur Amuak jaialdiaren aurkezpenean. Argazkia: Ondarroako Udala Ondarroako Udalak zortzigarrenez antolatu du literatura, euskara eta ikus-entzunezkoak uztartzen dituen Literatur Amuak jaialdia. Antolatzaileek jakitera eman dutenez, jaialdiak hamar ekintza dakartza, eta hainbat sortzaile eta ehunka parte hartzaile edukiko ditu.
Egitaraua urriaren 25etik azaroaren 3ra bitartean gauzatuko bada ere, jaialdiari hasiera herriko ikastetxeetako ikasleek eman zieten aurreko barikuan [urriak 11], Augustin Zubikarai VIII. Liburuen Amuak egitasmoaren baitako lehen deialdiagaz estreinatuko dute egitaraua, hain zuzen. Urriaren 25ean Joxemari Urteaga idazle eta kultur eragileak gidatuta, irakurle taldekoek Basa liburuari buruz berba egiteko tartea edukiko dute, Miren Amuriza idazle berriztarragaz batera.
Egitarauko gainontzeko jarduerak hurrengo astean egingo dituzte. Urriaren 30a, esate baterako, Augustin Zubikarai idazle ondarrutarra gogoan hartuta literaturari zuzendutako eguna izango dela aurreratu dute. 18:00etan ipuin rallyko sari banaketa ekitaldia egingo da Kofradia Zaharrean. Ordu erdi beranduago, nanoipuin lehiaketako sariak banatuko dituzte. Azkenik, Augustin Zubikarai nobela bekagaz lotutako aurkezpenak egingo dituzte. Hasteko, Eneko Barberenak 2018ko nobela bekari esker idatzitako Afrikanerrak nobela aurkeztuko du Joxemari Urteagaren eskutik. Jarraian, aurtengo nobela bekaren irabazlearen izena ezagutzera eman du Xabier Mendigurenek.
Literatur Amuek ikerketarako tartea ere edukiko dute aurten. Urriaren 31n Kike Amonarriz eta Jon Fernandez kazetari ondarrutarrak Ondarroako gazteek sare sozialetan dituzten hizkuntza ohiturak emango dituzte ezagutzera. Ikerketa egin duen Fernandezek eta haren tutorea izan den Amonarrizek azalpenak emango dituzte ikerketan parte hartu duten herriko batxilergoko ikasleekin batera.
Herriko artistek eta sortzaileek ere edukiko dute tartea jaialdian. Azaroaren 1ean, esaterako, dantza, antzerkia eta ikus-entzunezkoak uztartzen dituen Lua Kastore eskainiko du Oihane Enbeitak eta Andoni Gartzia eta Eneritz Zeberio ondarrutarrek osatzen duten Ma Kolektiboak. Galdu ezinezko beste hainbat hitzordu ere badakartza Literatur Amuak jaialdiak. Euskal sorkuntza izango da protagonista; komiki musikatuak, solasaldiak, musika ikuskizunak eta sormen proposamenak ere badira ekimenaren parte.
