Zabalik dago Ondarroako Boga Boga Emakumion Elkartean izena emateko epea
Urriaren amaiera arte eman daiteke izena. Taldekideak eguenero batzen dira Etxelilan lagunarteko giroan, 16:30etik 18:30era.
Abian da Ondarroako Boga Boga Emakumion Elkartearen ikasturte berria. Aurreko astean hasi ziren abantean, eta maiatzaren erdira arte hainbat gairi buruz berba egiteko eta ikasteko aukera edukiko dute bertan batzen diren andre helduek. Taldekideek esan dutenez, taldera jende berria gehitzea nahi dute; herriko emakumee heldu guztiei gonbidapena luzatu diete. “Taldekide berriak beso zabalik hartuko ditugu”. Interesatuek urriaren amaiera arte izena eman ahal dute.
Taldekideak eguenero batzen dira Etxelilan lagunarteko giroan, 16:30etik 18:30era. Nabarmendu dutenez, hara hurreratzen direnek emakumeen txoko eta babesleku bat aurkituko dute. Naroa Argoitia Iñurrita taldearen dinamizatzaileak gogorarazi duenez, taldeak “lasai eta konfiantzan” berba egiteko espazio bat eskaintzen du. Zehatz esateko, euren kezka edo nahiei buruz berba egin eta elkarbanatzeko espazio bat izango dute parte hartzaileek. “Eguneroko gaiei buruz konfiantzan eta lasai berba egin, lantzeko eta ikasteko espazio egokia da. Gure helburua elkarregaz gustura egotea da”.
Argoitiak esan du ikasturte berrirako programa “anitza eta zabala” prestatu dutela. Ikasturte osoan hainbat gai eta arlo landuko dituzte, beti ere, emakumeen jabekuntzaren ikuspegitik. “Beti kulturagaz edo arteagaz lotutako zer edo zer egongo da. Antzerki edo filmeren bat ikustera joateko irteeraren bat egingo dugu. Etxelilan bertan kulturagaz lotutako zer edo zer antolatzeko asmoa ere badugu: filmeen proiekzioa edo mitologiari buruzko erakusketaren bat, esate baterako”.
Gainera, hilero, jabekuntzagaz lotutako bi jardunaldi egingo dituzte. Bestelako berbaldietan ere beste hainbat gai landuko dituzte .”Harremanei buruz berba egitera etorriko da Nerea Redondo, elikadura ere landuko dugu, psikologia, indarkeria matxista… Oro har, interesgarriak izan daitezkeen hainbat gai landuko ditugu. Saioak, egia esan, oso parte hartzaileak izaten dira”.
