Asteburu Mikologikoa izango dute Mendexan
Perretxikoak biltzeko irteera egingo dute zapatuan. Perretxiko erakusketa domekan egongo da zabalik.
Asteburu Mikologikoa edukiko dute Mendexan zapatu-domekan [urriak 26 eta 27]. Perretxiko bilketagaz hasiko dute egitaraua, eta horretarako irteera bat antolatu dute. Zapatuan, 08:00etan, txokoan elkartu eta irteeraren inguruko oharrak partekatu ondoren, plazatik aterako dira perretxikoen bila.
Bildutako guztia 12:00etan jasoko dute udaletxeko ganbaran. Bertan egongo da Jose Mari Ibarbia mikologian aditua, eta bere laguntzagaz perretxikoak sailkatuko dituzte. Azaldu dutenez, bilketa bere kabuz egiten duten herritarrek ere eraman ahal dituzte batutako perretxikoak, 12:00etatik aurrera.
Perretxiko horiek guztiak ikusgai egongo dira domekan zabalduko duten erakusketan. 11:00etatik 13:00etara egongo da perretxikoak ikusi bai eta dastatzeko aukera ere.
