Antzerkizaleen gosea asetzera dator Mutrikuko Antzerkiaz Blai! jaialdia
Hamar lan taularatuko dituzte barikutik abenduaren 15era arte Zabiel kultur etxeko ganbarako agertokian. Hika Teatroaren 'Txarriboda' antzezlan arrakastatsua arduratuko da aurtengo jaialdia zabaltzeaz.
Argazkia: Otxabi Studioa. Antzerki munduan murgiltzeko aukera edukiko dute datozen asteetan Mutrikura hurreratzen direnek. Barikuan [azaroak 8] hasiko da Antzerkiaz Blai!, eta abenduaren 15era bitartean, sei emanaldi eskainiko dituzte. Mutriku eta inguruko herrietako antzerkizaleen gosea asetzeko nahikoa antzerki dakartza aurtengo egitarauak. Hain zuzen ere, bost talderen eskutik adin tarte guztietako herritarrei zuzendutako hamar lan taularatuko dituzte.
Emanaldi guztiak Zabiel kultur etxeko ganbarako agertokian eskainiko dituzte, eta abenduaren 1ean eskainiko duten antzezlana izan ezik, beste guztietan sarrera doakoa izango da. Zehatz esan, Txalo produkzioaken Rita lan ezaguna ikusteko bost euro ordaindu beharko dira. Antolatzaileek aurreratu dutenez, aldez aurretik sarrerak erosteko aukera egongo da turismo bulegoan. Azaroan 25ean jarriko dituzte salgai.
Hika Teatroaren Txarriboda antzezlan arrakastatsua arduratuko da aurtengo jaialdia zabaltzeaz. Barikuan [azaroak 8] 19:00etan hasita eskainiko dute Mireia eta Imanolen ezkon-festa oinarri duen antzezlana. Taulagainean, besteak beste, Iñaki Maruri aktore ondarrutarra ikusteko aukera egongo da. Marurik aktore zein piano jotzaile papera betetzen du. Onintza Enbeita muxikarrak ere jarri du bere aletxoa, kantuen letrak eginez.
Punta-puntako euskal ekoizpenez gain, zaleek herrian sortutako lanez gozatzeko aukera edukiko dute
Mutrikuko udal ordezkariek antzerkizale guztiak gonbidatu dituzte saiora, eta jakitera eman dutenez, emanaldirako doako gonbidapenak aldez aurretik jasotzeko aukera egongo da liburutegian. 100 bat gonbidapen ipini dituzte eskuragai, eta horiek barikura arte eskuratu daitezke, honako ordutegian: 10.00etatik 13:00etara eta 17:00tatik 20:00etara. “Pertsonako, gehienez ere, lau sarrera eskuratu ahal izango dira”.
Urtero modura, herriko antzerkigileen plaza ere izango da Antzerkiaz Blai! Punta-puntako euskal ekoizpenez gain, zaleek herrian sortutako lanez gozatzeko aukera edukiko dute. Urtebeteko etenaldia egin ondoren, Goizeko Izarra antzerki taldea Argazkiak eta Beldurrari aurre egin lanak taularatzeko prest dago azaroaren 24an. Gaztetxoez osaturiko Akelarre antzerki taldeak itxiko du aurtengo jaialdia. Maria Martinezek zuzendutako taldeak bost antzezlan txiki eskainiko ditu, bi emanalditan banatuta. Abenduaren 13an Sorpresadun pisua eta Ligatzeko klaseak eskainiko dituzte eta abenduaren 15ean, berriz, Roboten denda; Neskak, mendia eta beste guztiak eta Lorontzien epaiketa estreinatuko dituzte.
EGITARAUA:
- Azaroak 8: Txarriboda (HIKA Teatroa), 19:00etan, Zabielen. Gonbidapenekin sartu ahalkoda. Gonbidapenak liburutegian daude eskuragai.
- Azaroak 17: Harro nago Zirtaka antzerki taldearen haurrentzako ikuskizuna, 18:00etan, Zabielen.
- Azaroak 24: Goizeko Izarra antzerki taldearen Argazkiak eta Beldurrari aurre egin antzezlanak, 19:00etan, Zabielen.
- Abenduak 1: Rita (Txalo produkzioak), 19:00etan, Zabielen. Prezioa: 5 euro.
- Abenduak 13: Akelarre antzerki taldearen Sorpresadun pisua eta Ligatzeko klaseak antzezlanak, 19:00etan, Zabielen.
- Abenduak 15: Akelarre antzerki taldearen antzezlanak, 19:00etan, Zabielen: Roboten denda, Neska, mendia eta beste guztiak eta Lorontziaren epaiketa.
