Bi autoren arteko istripua egon da Mutrikun
Istripua dela eta, suhiltzaileek harrapatuta geratu diren bi pertsona atera behar izan dituzte ibilgailuetatik. Errepidea itxita egon da, eta zirkulazioa Galdonatik zehar desbideratu behar izan dute.
Mutrikuko Mijoa auzoan egondako auto istripua. Argazkia: Suhiltzaileak Herrizaingo Sailak jakitera eman duenez, 07:30ak baino minutu batzuk arinago, gaur [azaroak 6] bi autok elkar jo dute Mutriku eta Ondarroa arteko GI-638 errepidean, 7. kilometroan. Zehatz esanda, Mijoa auzoan izan da istripua, Mijoa industrialdeko sarreraren parean aurrez aurre jo dute Fiat Stilo eta Opel Vectra batek. Istripua larria izan da eta, suhiltzaileek autoetan zihoazen gizonak atera behar izan dituzte, harrapatuta zeudelako. Istripuaren gunean bertan artatu dituzte bi gizonezkoak, eta ondoren, ospitaleratu egin dituzte. Zaurituetako bat Donostiako ospitalera bidali dute eta bestea Galdakao-Usansolokora.
Istripuaren ondorioz, errepidea itxita egon da hasieran. Auto pilaketak sortu dira, eta autobusek ere beranduago eman behar izan dute zerbitzua. Zirkulazioa Galdonatik zehar desbideratu behar izan dute, baina jakitera eman dutenez, 08:45ak aldera, bideetako bat zabaldu dute. Ertzainak txandaka ibili dira inguruko zirkulazioa zuzentzen. Istripua eduki duten ibilgailuak eraman eta bidea garbitu ostean, 10:30ak inguruan errepidea normaltasunera bueltatu da.
Larrialdi zerbitzuetako kideak zaurituetako bat artatzen. Argazkia: Suhiltzaileak
Istripua eduki duen autoetako bat. Argazkia: Suhiltzaileak
