Ondarroako Yaalah elkarteak Sahararen aldeko elkartasun zozketa antolatu du bigarrenez
Azaroaren 23an egingo duten zozketako txartelak Gaztedin, Kirrixkin, Amarratzan, Kuriken, Zurrumurrun eta Koxkorran erosi daitezke euro baten truke.
Yaalah elkarteko kideak elkartasun zozketako txartelak saltzen Iaz egin modura, aurten ere elkartasun zozketa egingo dute Ondarroako Yaalah elkarteko kideek. Azaroaren 23an egingo dute zozketa Alamedan, eta txartelak hainbat tokitan salgai daudela jakitera eman dute. Gaztedin, Kirrixkin, Amarratzan, Kuriken, Zurrumurrun eta Koxkorran lortu daitezke. Eguen iluntzeetan eta domeka eguerdietan, bestalde, elkarteko kideak kalean egongo dira zozketako txartelak saltzen. Txartelez gain, kamisetak eta txapak ere edukiko dituzte saltzen.
Euro baten truke Saharar herriaren aldeko proiektuan laguntzeko aukera edukiko dute herritarrek. Elkarteko kideek aurreratu dutenez, zozketatik lortuko duten dirua elkartearen jardunera bideratuko dute, tartean, abenduan egingo duten elkartasun bidaira.
Parte hartzen dutenek zazpi sari lortzeko aukera edukiko dute: Iñigo Martinezek sinatutako Athleticeko kamiseta; Asier Illarramendik sinatutako Real Sociedadeko kamiseta; Aurrera futbol taldeko, Ondarroa Arraun Elkarteko eta Ondarroa Igeri Taldeko kamiseta bana; Yaalah Elkarteko kirol-jertsea eta Aurrera Txirrindu Elkarteko maillota.
Elkarteko kideek gogorarazi dutenez, gainera, elkarteko kirol-jertseak eta kamisetak eskatzeko aukera dago azaroaren 23ra arte. Azaldu dutenez, jertseak edo kamisetak honako webgunean dagoen eskari orri bat beteta eskatu beharko dira. “Bertan agertzen da eskaria egiteko bete beharreko guztia. Behin eskaria eginda, eskaria non eta noiz jaso behar den posta elektronikoz jakinaraziko dugu”.
Azpimarratu dutenez, enkarguz egingo dituzte jertseak eta kamisetak. Hori dela eta, eskaria egiterako orduan kolorea eta neurria aukeratu behar dira. Kirol jerts bakoitzak 25 euro balio ditu eta kamiseta bakoitzak 12 euro. “Ordainketa eskaria hartzen den egunean eta lekuan egingo da”. Edozein zalantza argitzeko yaalahelkartea@gmail.com helbide elektronikora idatzi daiteke.
