Akordiorako oinarria lortu dute Bizkaiko Metalgintzako Hitzarmenean
Egun osoko batzar luzearen ostean, eta Bizkaiko Metalgintzako Mahaiko gehiengoaren babesarekin, Bizkaiko Metalgintza sektoreko aurreakordioa sinatu zuten atzo [azaroak 26] iluntzean.
Metalgintzako beharginen elkarretaratzea Markina-Xemeinen. LAB, CCOO eta UGT sindikatuek Bizkaiko metalgintzako FMEV patronalagaz akordiorako oinarri bat adostu dute, eta biharko [azaroak 28] eta etzirako [azaroak 29] iragarrita zeuden greba deialdiak bertan behera lagatzea erabaki dute. Orain arte hamar greba egun egin dituzte, eta patronalak sindikatuen aldarrikapenak onartu izan ez balitu, bihar [azaroak 28] hasita, beste zortzi greba egun egiteko prest zeuden.
Akordioa hurrengo hiru urtetarako adostu dute, 2021a arte, hain zuzen. Patronalaren jarrera aldaketa Bizkaiko metalgintzako langileek egin dituzten mobilizazio eta grebei esker gertatu dela azpimarratu dute sindikatuek. Erabakiak sektoreko 50.000 langileri eragiten die; Lea-Artibai eta Busturialdeko 3.500 langileri, gutxi gorabehera.
Hala ere, FMEV patronalak sindikatuei aurkeztutako azken proposamena sakonago aztertuko dutela jakitera eman dute hiru sindikatuek. ELAk, oraingoz, ez du bat egin akordioagaz; denbora eskatu du patronalaren proposamena aztertzeko. Beharrezkotzat jotzen du patronalak emandako testuak aztertzea, eta bere ordezkariekin batera, eman beharreko hurrengo urratsak erabakitzea. “Proposamenaren lehen azterketa bat egin ondoren, uste dugu gai batzuk hobetu egin behar direla. Kezkaz ikusten dugu, gainera, atzerapausoren bat gertatuko ote den”.
Desadostasunik ezean, hitzarmen berriaren sinadura datorren astelehenean [abenduaren 2] egingo dute. Eta behin-behinean adostutako akordioa datozen egunotan egonkotu eta itun ofizial bihurtzen bada, ez dute grebarik egingo. Bestalakoan, abenduan iragarritako grebekin jarraituko duela aurreratu dute.
LABek nabarmendu duenez, aurreakordio historikoa da atzo lortutakoa. “Historikoa, orain arte sektore honetan ez zeuden edukiak lortu ditugulako. Borroka honen hasieran prekarietatea eta diskriminazioa borrokatzea jartzen genuen helburu nagusitzat, sektorean ematen diren egoera prekarioei aurre egiteko; subrograzioa, estatalizazio, dualitatea, behin-behinekotasuna, lan osasuna, berdintasunik eza… eta, bide horretan, aurrera urrats historikoak lortu ditugu. LAB sindikatuaren aitzindaritza funtsezkoa eta erabakigarria izan da borroka hau sortu, bidea egin eta helmugara iristeko. Harro gaude egindako lanarekin eta harro gure oinarriekin”.
Honakoak dira aurreakordioan jasotako lorpenak:
- Subrogazioa mantenua egiten duten langileentzat.
- Berdintasun batzorde bat sortzeko, berdintasun planak egiteko eta kontratazioan generoa ez kontuan izateko konpromisoa.
- Dualitatearen eta estatalizazioaren aurkako neurriak.
- Behin-behinekotasunari mugak ezartzea.
- Kontratazio zuzena bultzatzea, aldi baterako laneko enpresen bidez eginiko kontratuak murrizteko.
- Lan osasun galera murrizteko neurriak.
- Soldatei dagokienez, 2019rako KPIa gehi %1,75eko igoera; eta 2020. eta 2021. urteetarako, KPIa gehi 1,5.
