Sarats dantza taldeak jasoko du Berriatuko VI. Goikolau Saria
Goikolau Saria jasoko duten seigarrenak izango dira dantza taldeko kideak. Aurretik, Eliz abesbatzak, Txirrindulari Elkarteak, Berriatuko probalariek, Berriatuko Futbol Taldeak eta Kofradiek jaso dute. Sari banaketa ekitaldia barikuan egingo dute Mendibarren pilotalekuan.
Berriatuko Sarats dantza taldeko kideak, artxiboko irudian Goikolau elkarteak jakitera eman duenez, herritarrengandik, eta oro har, herriarengandik egindako lana ikustaraztea eta eskertzea helburu duen Goikolau Sari preziatua Sarats Dantza Taldeak jasoko du aurten. “Dantza egiteko aterpea ziurtatzearren”, Berriatuko Mendibarren pilotalekuan egingo dute Sari banaketa ekitaldia, barikuan [azaroak 29], 19:30ean hasita.
Taldea saritzeko hamaika arrazoi daudela nabarmendu dute Goikolau elkarteko kideek. Bereziki, euskal kulturaren ardatzetako bat diren dantzak transmititzen jarraitzeko grina aitortu nahi diote herriko taldeari sariagaz. “Sarats Dantza Taldea herriko gazte batzuk sortu zuten 70eko harmakadan. Eta taldearen jarduna etenda egon ostean, Antigua Ibazeta Goitiz dantza irakasleak taldea berriro martxan ipini zuen duela hamar bat urte herriko hainbat umeekin”.
Ekitaldia ikus-entzunezko proiekzioagaz hasiko dute. Goikolau elkarteak Eneko Elezgarai Urkiza mutrikuarrarekin batera egin duen Sarats Dantza Taldearen ibilbidea laburbiltzen duen 20 minutu pasatxoko Sarats plazan dokumentala proiektatuko dute, hain zuen. Elkarteko kideek aurreratu dutenez, sasoi bateko taldean eta gaur egun jardunean jarraitzen dutenei egindako elkarrizketa zatiak eta bestelako irudiak ikusi ahalko dira.
Ondoren, saria emango diete herriko dantzariei. Antigua Ibazeta Goitizek jasoko du saria taldearen izenean. Azkenik, dantza taldeko kideek Soka Dantza dantzatuko dute bertaratzen diren herritarren gozamenerako. Goikolau kultur elkarteko kideek Mendibarrenko harmailak jendez betetzera gonbidatu dituzte.
Zapatura [azaroak 30] arte, bestalde, zabalik dago Goikolau aretoan Sarats dantza taldearen argazkien erakusketa.
