Eba Ibarrola eta Idoia Arrillaga mutrikuarrek irabazi dute Debako Pala Txapelketa
Mutrikuko Neska Palistak elkarteko kideek bigarrenez jarraian irabazi dute Debako txapel preziatua. Finala Iratxe eta Maite Barruetabeña mutrikuarren aurka irabazi dute.
Eba Ibarrola eta Idoia Arrillaga txapelak soinean. Argazkia: Iruleak elkartea. Eba Ibarrola eta Idoia Arrillaga mutrikuarrek nagusitasun osoz irabazi dute Debako VIII. Emakumeen Pala Txapelketa-V. Maite Etxeberria oroimenezkoa. Finala ere beste mutrikuar batzuen aurka jokatu zuten zapatuan [azaroak 30], Debako Aldats pilotalekuan. Mutrikuko Neska Palistak Elkarteko bikoteak 22-13 hartu zituen mendean elkarte bereko Iratxe eta Maite Barruetabeña ahizpak.
Txapela Mutrikun geratuko zela argi eta garbi zegoen. Ibarrolak eta Arrillagak, gainera, bigarren urtez jarraian jantzi dute Debako txapela. “Iaz ere Barruetabeña ahizpen aurka irabazi genuen finala. Oso pozik gaude. Oso aurkari gogorrak dira, eta ez genuen uste hainbesteko aldearekin irabaziko genienik”. Bi bikoteen arteko lehia gogorra izan zen lehen tantoetan. Lehen hiru tantoetan oso parekatuta ibili ziren, baina laugarren tantoan aurrea hartu zuten Ibarrolak eta Arrillagak. “Gure taktika aurkarietako bat kargatzea izan zen”.
Eba Ibarrola eta Idoia Arrillaga txapelak soinean. Argazkia: Iruleak
Lau taldetan banatutako jokatu dute sailkapen fasea. Finalera ailegatu diren bi taldeak ez dira izan euren talde buruak. Aurtengo txapeldunek partida bakarra galdu dute. “Sailkapen fasean partida bat galdu genuen. Osteko denak bata bestearen atzetik irabazi ditugu. Barruetabeña ahizpek ere sailkapen fasean partida bakarra galdu zuten”.
Iruleak Emakume Pilotariak antolatutako txapelketa irailean hirugarren astean hasi zuten. 18 eta 54 urte bitarteko Euskal Herriko hainbat txokotatik etorritako 22 bikotek parte hartu dute bertan. Mutrikuarren artean sekulako arrakasta du Debako txapelketak. Aurten, esaterako, Mutrikuko Neska Palistak elkarteko bost bikotek parte hartu dute bertan.
