Musikari buruzko solasaldi interesgarriarekin dator Mutrikuko Abendurock jaialdia
MRK-ko kideen eskutik ate joka dator 15. Abendurock. Urteurren borobila ospatzeko musikarekin zerikusi estua duten hainbat ekintza dakartza jaialdiak. Horietan aipagarriena, Ines Osinagak eta Jurgi Ekizak abenduaren 15ean eskainiko duten solasaldia izango da.
Mutrikuko Rock Kolektiboko kideak, Abendurockeko kartelak eskuetan Urtero modura doakoak izango diren ekintzetara gonbidatu dituzte kulturzale guztiak. Aurtengo berritasuna abenduaren 15ean Ines Osinagak eta Jurgi Ekizak Gaztetxean eskainiko duten solasaldia izango dela iragarri dute MRK-ko kideek. Jaialdiaren baitan, hain zuzen, estreinako antolatu dute berbaldia. “Egungo euskal musikaren bi erreferente eta ereduak musikari buruz ariko dira gurean, ezusteko eta guzti”. Antolatzaileek aurreratu dutenez, Koldo Otamendi (Musikazuzenean) arduratuko da bi musikari ezagunen arteko elkarrizketa bideratzeaz.
Eskaintza kultural handiarekin dator aurten musika jaialdia. Hainbat kontzertu antolatu dituzte, eta horiez gain, musikarekin zerikusi estua duen Bohemian Rhapsody filmaren proiekzioa ere egingo dute. Queen talde ezaguna oinarri hartuta duen filma domekan [abenduak 8] proiektatuko dute, Zabielen.
Antolatzaileek azpimarratu dutenez, aurten ere zuzeneko indartsuekin dator jaialdia. Kontzertu eskaintzaren artean, aipagarriena Eraso! taldearen kontzertua izango dela esan dute MRK-ko kideek. Bihar [abenduak 6], talde zarauztarraren kontzertuak emango dio hasiera urteroko zita garrantzitsuari. Taldeak lehen diskoa argitaratu zuenetik 20 urte bete dira, eta horren harira, bira berezia egiten ari dira.
Hurrengo hiru asteburuak ere estilo askotariko musika estiloek zipriztinduta etorriko dira. Bigarren asteburuan, esaterako, Roy Veloces eta La ultima bala talde zaldibartarren rock-and-roll soinuek beteko dute Gaztetxea. Hirugarren asteburuan, Kokein boskote eibartarraren txanda izango da. Biharamunean, abenduaren 21ean, rock kolektiboko talde guztiak protagonista bihurtzen diren MRK gaua ospatuko dute. Euskal taldeen bertsioez gain, nazioartean ezagunagoak diren kantuak ere bertsionatuko dituzte.
Abenduaren 27an, euskal kultura, musika elektronikoa eta swinga uztartzen dituen Koban talde donostiarraren kontzertuak itxiko du jaialdia. “Trikitixa, pianoa, gitarra, sintetizadorea, perkusioa… baina, batez ere, bost emakumeren ahots ahaltsu bezain liluragarria da talde honen gakoetako bat.”.
EGITARAUA:
- Abenduak 6, barikua. 22:30ean, Gaztetxean, Eraso!
- Abenduak 8, domeka. 18:00etan, Zabielen, Bohemian rhapsody filma.
- Abenduak 13, barikua. 22:30ean, Gaztetxean, Roy Veloces eta La ultima bala.
- Abenduak 15, domeka. 17:30ean, Gaztetxean, Ines Osinagaren eta Jurgi Ekizaren solasaldia.
- Abenduak 20, barikua. 22:30ean, Gaztetxean, Kokein.
- Abenduak 21, zapatua. 22:30ean, Gaztetxean, MRK gaua.
- Abenduak 27, barikua. 22:30ean, Gaztetxean, Koban.
