Internet eta telefono zerbitzuekin arazoak eduki dituzten herritarrei aholakularitza eskainiko diete Ondarroan
Kontsumo Bulegoko arduradunek jakitera eman dutenez, inguruko herrietan ere arazoak egon dira egunotan. Behar izanez gero, aholkularitza zerbitzua guztiei emango diete Ondarroako bulegoan, eguenetan.
Azken hiru egunetan Internet eta telefono zerbitzu batzuekin egon diren arazoak ikusita, Ondarroako Udalak Kontsumo Bulegora hurreratzeko deia egin die herritarrei. Kontsumo Bulegoko arduradunek azpimarratu dutenez, ondarrutarrak ez ezik, inguruko herrietako hainbat lagun ere hurreratu dira Kontsumo Bulegora. Besteak beste, Berriatuan eta Mutrikun ere Internet eta telefonoagaz arazoak egon dira egunotan. “Nahiz eta aholkularitza guztiei eskaini ahal izan, kexaren izpideak egiteko beharrezkoa da Ondarroan erroldatuta egotea”.
Ondarroako udal iturriek jakitera eman dutenez, herritar askori eragin die arazoak: enpresei, familiei, ikastetxeei, unibertsitateko lanak Internet bidez aurkeztu behar dituzten ikasleei… Kontsumo Bulegoa zerbitzua ematen duen Movistar enpresagaz ipini da harremanetan, eta emandako azalpenen arabera, “gertaera telefonogune batean eman da”. Esan dietenez, arazoa gutxika konpontzen ari dira.
Udalak jakinarazi duenez, 2019ko abenduan ere beste bi egunez zerbitzurik barik egon ziren hainbat herritar. “Ez da horrelako zer edo zer gertatzen den lehen aldia”.
Zunbeltz Bedialauneta Ibaibarriaga alkateak adierazi duenez, udalak azalpenak eskatu dizkio enpresari, baina emandako erantzuna Kontsumo Bulegoari emandako bera izan da. “Ez da hau gertatzen den lehen aldia, eta oraingoan gainera hiru egunez luzatu da. Herritarrei Kontsumo Bulegoaren bitartez kexak bideratzeko zerbitzua martxan dagoela gogorarazi nahi diet”.
Bedialaunetak nabarmendu duenez, erabiltzaileen eskubideak defendatzea beharrezkoa da, “gehiago halako enpresa handien aurrean. Kontsumo Bulegoa kontsumitzaileei euren eskubideak defendatzen laguntzeko dago”. Kontsumo Bulegoa eguenetan egoten da zabalik Alamedako bulegoetan, 09:00etatik 14:00etara, eta bertan, arazoaren aurrean zelan jokatu jakiteko aholkularitza zerbitzua eskainiko diete norbanakoei. Aholkularitza zerbitzu horren bidez, kexak bideratzen ere lagunduko dute Kontsumo Bulegotik. Bertaratu ezin dutenentzat ere ondarroakiub@ondarroa.eus posta elektronikoa eta 94-683 04 98 telefono zenbakia ipini dituzte erabilgarri.
