Urtarrilaren 26an hasiko da Mutrikuko Emakumezkoen Binakako I. Pala Txapelketa
Txapelketan parte hartzeko interesa dutenek astelehena aurretik izena eman beharko dute. Eta txapelketa binakakoa bada ere, izen ematea bakarka ere egin daitekeela aurreratu dute antolatzaileek.
Iazko Mutrikuko pala txapelketa azkarreko finalistak. Argazkia: Mutrikuko Emakume Palistak Mutrikuko Emakume Palistak elkarteak aurten, estreinako, Emakumezkoen Binakako Pala Txapelketa luzea antolatu du. Orain arte jardunaldi bakarreko txapelketa azkarrak antolatu ohi izan dituzte, baina, aurten, txapelketa luzeagoa antolatzea erabaki dute mutrikuarrek. Adierazi dutenez, txapelketa hilaren 26n hasiko da abian, eta izen ematea zabalik dago. “18 urtetik gorako emakumeek eman ahal izango dute izena”.
Txapelketan parte hartzeko interesa dutenek astelehena [urtarrilak 20] aurretik izena eman beharko dute emakumepalistak@gmail.com posta elektronikora idatzita. “10 euro ordaindu beharko dira pertsonako izena ematerako orduan. Posta elektroniko berean izen-abizenak, NA zenbakia, mugikor zenbakia eta posta elektronikoa ere gehitu beharko dira, komunikatzeko edo azken berriak eman ahal izateko”.
Eta txapelketa binakakoa bada ere, izen ematea bakarka ere egin daitekeela aurreratu dute antolatzaileek. Bakarka izena ematen dutenek aurrelari edo atzelari postuan jokatu nahiago duten zehaztu beharko dute izena ematerako orduan. Antolakuntza ahal denik-eta bikote parekatuenak sortzen ahaleginduko da, bakarka izena ematen duten parte hartzaileak kontuan hartuta.
Txapelketan izena ematen duten emakume kopuruaren arabera, era batera edo bestera antolatuko dutela iragarri dute. Hori bai, ohi modura, teniseko pilotagaz jokatu dute. Partiduak domeka arratsaldetan jokatuko dituzte Miruaitz frontoian, eta lau domekatan banatuta, sailkapen ligaxka jokatuko dute. Ondoren, final-zortzirenak, final-laurdenak eta finalaurrekoa. “Gurea asmoa txapelketa martxoaren 8an amaitzea da”.
