Urteko asanblada berezia antolatu du Mutrikuko Arkugain elkarteak
Urteko batzar orokorraren ondoren, hamaiketakoa eta bazkaria ere egingo dituzte bazkideek. Bazkaritan parte hartu nahi dutenek aurretik eman behar dute izena.
Arkugain elkarte gastronomikoko ordezkariek jakitera eman dutenez, datorren zapatuan [urtarrilak 25], 11:00etan hasita, urteko batzar orokorra egingo dute elkartearen egoitzan. Besteak beste, 2019ko diru kontuak izango dituzte hizpide, eta horiez gain, zuzendaritza batzordeak 2020rako dituen asmoen eta proposamenen berri ere emango die bazkideei bileran.
Gaineratu dutenez, batzarra amaitu ondoren, ohi modura, hamaiketakoa egingo dute, eta nahi dutenek, 14:30ean egingo duten bazkarian geratzeko aukera ere edukiko dute. Hamaiketakoa doakoa dela iragarri dute, baina bazkaritara joan nahi dutenek 20 euro ordaindu beharko dituzte. Bazkaritarako, gainera, aurretik eman beharko da. Bertan parte hartu nahi dutenek martitzenera [urtarrilak 21] arte dute horretarako aukera. “Elkarteko oholean jarrita dagoen orrian norbere izen-abizenak idaztea nahikoa izango da. Iaz 34 bat lagun batu ginen bazkaritan giro ezinhobean, eta aurten ere antzeko kopurua batzea espero dugu. Oraingoz 25 bat lagunek eman dute izena”.
