2019an gehitu egin ziren turistek Lea-Artibaira egindako bisitak
Aldundiko ordezkariek esan dute urtez urte bisitarien fluxua Bilbotik haratago birbanatzen dela. Besteak beste, Lea-Artibaira eta Durangaldera egindako bisitak dira igo direnak.
Bizkaiko Foru Aldundiak 2019ko turismo fluxuaren datuak aurkeztu ditu. Cristina Mugika Lehiakortasuneko eta Turismoko zuzendariak azaldu duenez, aurreko urteekin alderatuta, gero eta gehiago dira Bizkaia bisitatzera etortzen diren turistak. Horrez gain, turista horiek Bilbon geratu ordez, inguruko eskualdeetara ere gero eta gehiago etortzen direla gaineratu du, “lehen ez bezala”.
Oro har, urtez urte, Bizkaian gero eta gaualdi gehiago egiten direla azaldu du Mugikak. “Garrantzitsua da nabarmentzea gaua Bilbotik kanpo egiten duten turista edo pertsonen multzoa 500.000 baino gehiagokoa dela”. Besteak beste, bisitatzen dituzten eskualdeak Uribe Kosta eta Urdaibai izateaz gain, Lea-Artibain eta Durangaldean ere gero eta bisita gehiago zenbatzen direla diote.
Dena dela, emaitzak hobetzen badihoaz ere, oraindik asko dagoela egiteko diote. “Zalantzarik gabe, bisita kopuruaren oreka Arratia-Nerbioi eta Enkarterri eskualdeetara ere iristeko lan handia dugu egiteko. Datozen urteetarako horretan daukagu jarrita ardatza”.