Inauterietako playback eta mozorro lehiaketak antolatu dituzte Ondarroan
Zabalik daude playback lehiaketan parte hartzeko zerrendak. Mozorro lehiaketan, berriz, egunean bertan izena eman beharko dute interesatuek.
Ondarroako Udalak iragarri duenez, aurten ere playback eta mozorro lehiaketak egongo dira Inauterien harira. Mozorro lehiaketa otsailaren 22 gauean egingo dute Musika Plazan, eta playback lehiaketa, ostera, otsailaren 25 iluntzean, Beikozini aretoan.
Zehaztu dutenez, mozorro lehiaketa 22:30ean hasiko den Joxpa erromeria taldearen etenaldian egingo dute; 23:15ak aldera. Lehiaketan parte hartu nahi dutenek egunean bertan 22:30etik 23:00etara izena eman beharko dute, Musika Plazan. Bi sari banatuko dituzte erosketa txarteletan: 250 euroko saria talde onenarentzat eta 100 eurokoa banakako mozorro onenarentzat.
Playback lehiaketa, betiko legez, Inauterietako martitzenean egingo dute. Lehiaketa 18:00etan hasiko da Beikozinin. Izena emateko zerrendan zabalik daude, eta horretarako azken eguna otsailaren 18a izango da. Interesatuek udaletxeko kultura sailera jo beharko dute edo jrosa@ondarroa.eus posta elektronikora idatzi otsailaren 18ko 14:00ak baino lehen. Agertu dutenez, hiru sari banatuko dituzte erosketa txartel formatuan: irabazleak 150 euroko saria, bigarrenak 125 eurokoa eta hirugarrenak 75 eurokoa jasoko du.
