Mafiako hiru familiak bertsotan egin dute Akerbeltz gaztetxean
Arrakastaz ospatu zen zapatuan Markina-Xemeingo Gazte Asanbladak antolatutako bertso saio berezia. Bertsozalez bete zen gaztetxea.
Aker Rouge Bertso kabareteko protagonistak eta antolatzaileak Akerbeltz gaztetxean. Argazkia: MGA Akerbeltz gaztetxea ateraino bete du aurten ere Markina-Xemeingo Gazte Asanbladak antolatutako bertso saio bereziak. Gaztetxea kabaret bihurtuta, ikusleak ere animatu ziren zapatuan [otsailak 1] 1920ko hamarkadari lotutako jantziak janztera, ekimenari oraindik ere giro hobea emanez. 120 lagun elkartu ziren afarirako, aulki guztiak betez, eta beste 30 lagun inguruk jarraitu zuten zutik Aker Rouge Bertso Kabareta.
Saioa ere oso ondo joan zela eta, pozik agertu dira Markina-Xemeingo Gazte Asanbladakoak. Bertsolariak hiru taldetan banatu zituzten, hiru mafia familitan: Italiarrak (Nahia Ibarzabal Gisasola, Nerea Ibarzabal Salegi eta Eneko Arrate Sololuze), Ingelesak (Joseba Sololuze Urizarbarrena, Josune Aramendi Perez eta Sara Asenjo Arrien) eta Amerikarrak (Aissa Intxausti Aburruza, Lander Ibarluzea Bikandi Aitxulua eta Xabat Galletebeitia Abaroa). Hiru mafiek batzarra egin zuten Akerbeltzen, mundua zeinek kontrolatuko zuen argitzeko. Hori erabakitzeko, hirurak aritu ziren zein baino zein gehiago bertsotan, eta euretako bi buruz burukora igaroko zirela espero zuten arren, ezustean, bakarra igaro zen aurrera. Horrela, buruz burukoan, mafia familia horren barruko agintaria nor izan behar zen erabaki zuten hiru kideen artean.
Hainbat lan egin behar izan zituzten bertsolariek saioaren fase bakoitzean, batzuek jolas modura, kopletan. Hala, esate baterako, Hiltzailearen jolasa egin zuten. Bertsolarien arteko bat hiltzailea zen, eta besteek nor zen asmatu behar zuten. Begiak itxi behar zituzten, eta hiltzaileak zaldiaren burua uzten zion hiltzen zuenari. Nor da nor jolasean ere jardun zuten. Herrikide bat bahitu zuen mafiak, eta nor zen asmatu behar izan zuten pisten bidez.
Ingelesen mafiako klana: Sara Asenjo Arrien, Josune Aramendi Perez eta Joseba Sololuze Urizarbarrena. Argazkia: MGA
Bestalde, hasierako ariketan botere harremanei buruz jardun zuten bederatzi bertsolariek, eta boterera ailegatu zen mafiako hiru kideek behin boterea lortuta botere horregaz zer egingo zuten azaldu zuten. Ingelesen mafiako klana ailegatu zen buruz burukora, eta Sololuze bihurtu zen hiruren arteko kapoa.
Erreleboa. Hiru bat orduko bertso saioaren ondoren ailegatu zen musikaren txanda. DJ Bullen saioan ere beteta egon zen gaztetxea, eta jaia goizeko ordu txikiak arte luzatu zuten.
MGAkoek gazteen parte hartzea azpimarratu dute, erreleboa badagoela ikusi dute. “Gazte asko animatu ziren bertso saiora, eta gazteek bertsoari gustua hartzen joatea pozgarria iruditzen zaigu. Antolatzen dugun bertso saio ezberdina horretarako bide ona dela uste dugu, bertsozaleak sortzeko eta erakartzeko”.
