Jokaldi ederrak eskaini ditu Lekeitioko Beteranoen Trinketeko Txapelketako bosgarren jardunaldiak
Lau partida jokatu ziren domekan [otsailak 9], eta apurka-apurka badoa ligaxkaren amaiera hurreratzen.
Astigarraga sakea errestatzeko prest. Argazkia: Julian Arrate Partidu orekatuak eskaini ditu Lekeitioko Beteranoen Trinketeko XV. Esku Pilota Txapelketako bosgarren jardunaldiak. Lau partida jokatu ziren domekan [otsailak 9], eta apurka-apurka badoa ligaxkaren amaiera hurreratzen.
Madariaga-Urkiaga eta Txapartegi-Hidalgo bikoteak neurtu ziren domekako lehen norgehiagokan. Txapartegi eta Hidalgo naiz eta hainbat bider aurretik jarri, Madariagak sakez, partidari buelta ematea lortu zuen. 7. 9. eta 25. tantoetan berdin joan ziren, baina, azken tantoak Madariaga eta Urkiagaren markagailura batu ziren. 30-25 irabazi zuten. Hala ere, Txapartegik eta Hidalgok hobekuntza nabarmena izan dutela esan dute txapelketaren antolatzaileek. “Txapelketa aurrera doan modura euren jokoa ere bai”.
Eguneko bigarren lehia Gandiaga anaiak eta Beraza-Telleria bikoteen artekoa izan zen. Iban Gandiagaren lana erabakigarria izan zela azaldu dute Gandiaga anaiek 30-21 irabazteko. “Partida aurrera atera zuen, eta naiz eta partida berdinduta joan 2. 8. eta 10. tantoetan, azken hamarkadan Ibanek sarera bidalitako pilotak eta egindako defentsa erabakigarriak izan dira”. Aurrean ere dema polita ikusi zen Eñaut Gandiaga eta Berazaren artean. Telleriak eskua minduta izan zuen, eta hainbat pilota txapara joan zitzaizkion.
30-21 emaitzagaz erabaki zen Moral-Foster eta Rober-Conde bikoteen arteko hirugarren partida. Hasieratik abantaila handia hartuta gailendu ziren Moral eta Foster. Moralek ondo bete zuen aurreko koadroetako jokoa, eta bien artean tartea handitzea lortu zuten. Rober eta Conde azken tantoetan hasi ziren markagailua hobetzen, Rober atzera igaro zenean.
Berdinketa izan zen nagusi azken partidan ere. 27ra berdindu zuten Astigarragak eta Praderak eta Jaunarenak eta Egañak. Ezustekoa egongo zela bazirudien ere, Astigarragak eta Praderak ondo eutsi zuten, azken tantoak maisutasunez jokatuz, eta partida euren alde amaitzea lortu zuten (30-27).
