'10 urte, Ibon eta Asier askatu' dinamikari hasiera emango diote asteburuan Ondarroan
2010eko sarekadaren 10. urteurrena gogoratzeko ekimenak egingo dituzte. Kontzertuetatik batutako dirua espetxe martxa diruz laguntzeko erabiliko dute.
Ertzaintzak 2010eko urtarrilaren 26an, 28an eta otsailaren 2aren artean egindako sarekada batean bederatzi herritar atxilotu zituzten, asko ondarrutarrak, ETArekiko lotura eta Ondarroako ertzainetxearen aurkako atentatua egitea egotzita. Eta gertaera hartatik hamarkada bat igaro ostean, 10 urte, Ibon eta Asier askatu dinamika antolatu dute Ondarroako Ernairen ekimenez. Dinamika horren barruko lehenengo ekimenak astebururako antolatu dituzte. “10 urte igaro dira, baina oraindik ere Ibon Iparragirrek eta Asier Badiolak espetxean jarraitzen dute, bahituta eta sakabanatuta”, esan dute.
Dinamikaren antolatzaileek azpimarratu dutenez, ekimenagaz elkartasuna helarazi nahi diete oraindik ere espetxean jarraitzen duten bi herritarrei. “Beste behin ere eurekin gaudela adieraziko diegu. Izan ere, denak etxera ekarri arte ez dugu atsedenik hartuko. Inposatzen diguten kontakizunari buruzko ariketa bat egiteko asmoa dugu, eta gure kontakizuna kaleratzeko bidean sortu dugu dinamika bera”.
Zapaturako [otsailak 15], esaterako, Atxilotu, torturatu eta espetxeratu mahai ingurua antolatuta zegoen, baina azken orduan bertan geratu da, Zaldibar argitu manifestazioa dela eta. 23:00etan, berriz, kontzertuak eskainiko dituzte Gaztetxean. Errietan talde mutrikuarraren doinuekin hasiko da gaua, eta DJ Jusefferen erritmo dantzagarriekin amaituko dute. Kontzertuetatik lortzen den dirua martxoaren amaieretan egingo duten espetxe martxa diruz laguntzeko izango dela aurreratu dute.”Borondatea eskatuko kontzertuaren sarreran eta tabernan ateratzen den dirua ere horretarako bideratuko dugu”.
Espetxe martxa, Ondarroatik Picassent-eko (Valentzia, Herrialde Katalanak) espetxera egingo dute; Asier Badiola espetxeratuta dagoen kartzelara, alegia. “Data zehazteko daukagu, baina gure asmoa Asierri babesa ematera joatea da. Asier kanpoan sakabanatuta dagoenetik berari babesa emateko espetxe martxa egitea egokiena zela iruditu zitzaigun”.
Hurrengo asteotan beste hainbat ekimen antolatzeko asmoa agertu dute. “Espetxe martxa burutu bitartean beste hainbat ekimen egiteko asmoa dugu. Aurrerago joango gara zehazten. Egon adi!”.
