Manifestazio bateratua egingo da Zaldibarko luizia salatzeko
Ermuatik, Eibartik eta Elgetatik irtengo dira zutabeak, eta guztiek Zaldibarren bat egingo dute.
Zaldibarko zabortegian gertatutakoa salatu eta azalpenak eskatzeko elkarretaratzea egin zen astelehenean Markina-Xemeingo Goiko Portalean. Manifestazio bateratua deitu da zapatuan [otsailak 15] Zaldibar argitu orain! lelopean. Hiru zutabe irtengo dira, eta guztiek Zaldibarren bat egingo dute.
Lehenengo zutabea Elgetako plazatik irtengo da 16:30ean, eta beste biak 17:00etan dute irteera ordua, bata Ermuko Cardenal Orbe plazatik irtengo da eta bestea Eibarko Amaña-Eibar tren geltokitik. Hiru zutabeen helmuga Zaldibarko Eitzaga auzoa izango da, eta bertan ekitaldi bat egingo dute. Maskarekin joateko eskatu dute.
Desagertuta jarraitzen duten beharginen senideei elkartasuna adierazi eta gertatutakoa argitzea eta erantzukizunak eskatzea dira herritarrek antolatutako mobilizazioen helburu nagusiak. Gertakariaren aurrean lantalde anitz bat sortu da, eta beharginetako bat Markina-Xemeingo bizilaguna izanik Markina-Xemein, Etxebarria eta eskualdeko herrietako jendea ere lanean dabil. “Zapatuko ekimenean jarri nahi ditugu indarrak”, adierazi dute.
