Piztiak taldearen lehenengo diskoa plataforma digitalean argitaratu dute
29 urte pasatu dira taldeak 'Huts nazazu' diskoa argitaratu zuenetik. Orain, taldearen bigarren diskoa argitaratu baino hilabete lehenago, lehenengo disko hura plataforma digitaletan aurkeztu dute.
Piztiak taldeak 1991. urtean argitaratutako Huts nazazu diskoa plataforma digitalean argitaratu da. Taldeko kideek azpimarratu dutenez, eurentzako lorpen garrantzitsua izan da lehenengo disko hura denen eskura egotea. “Uste dugu garrantzitsua dela oraingo eta hurrengo belaunaldiek gure musikaz gozatu ahal izateko aukera edukitzea”.
Piztiak taldeko kideak, 1991. urtean. Argazkia: Piztiak.
Huts nazazu diskoa Elkar argitaletxeak argitaratu zuen, binilo eta kasetean; Elkarrek Lasarten zeukan estudioetan grabatu zuten, Jean Phocasen eskutik. Ekoizpena, ostera, Piztiakeko kideek eta Juan Carlos Perezek egin zuten. “Aurkezpen kontzertua Donostian eman genuen, Euskadi Gazteak bere sorrera ospatzeko antolatutako ekitaldian. Horretan parte hartu zuten Hertzainak eta Tahures Zurdos taldeek”. Aurkezpen kontzertua eta gero, Euskal Herri osoan kontzertu asko eskaini zituztela gogorarazi dute. “Disko hau asko entzun zen garai hartan”.
Lehen disko horretan Itoizeko Jimy Arrabit eta Delirium Tremenseko J.J. Yurritak jo zuten bateria. “Itziar Alberdik Hire abestian bigarren ahotsa jarri zuen, eta Eduardo Yurritak piano akustikoa”.
Berria emateaz batera, taldeko kideek gogorarazi dute datorren hilean Hasi orduko bigarren diskoa argitaratuko dutela. “Horren berri aurrerago emango dugu”.
- Nazkante (Kirmen Uribe/Txomin Uribe)
- Itzulia (Kirmen Uribe/Txomin Uribe)
- Hire (Txomin Uribe)
- Beltza (Josu Aranbarri)
- Piztiak (Josu Aranbarri)
- Aldatzeko (Txomin Uribe)
Ondokoek osatzen dute Piztiak taldea: Txomin Uribe (ahotsa, gitarrak eta erritmo kutxa), Josu Aranbarri (ahotsak eta baxuak), Justo Urkiri (teklatuak) eta Bernar Ituarte (gitarrak).
