Udal iturriek azaldu dutenez, 08:50ean ur hodiaren ureztatze ahoa apurtu egin da auto batek jo ostean, eta horregatik hasi da ura irteten. “Udal brigadako langileak Beikozina ingurua urez garbitzen ari ziren bitartean, Beikozini parean gaizki aparkatuta zegoen auto batek ur hartunea jo du, eta instalazioan matxura eragin du”. Lurra garbitzeko erabiltzen duten ur tutua egokitzaile bategaz egoten da lotuta estolderira, baina kolpeak egokitzailean kalteak eragin ditu, eta horrenbestez uraren presioan aldaketak eragin ditu; baxuenetik gorenera.
Ura isurtzen hasi eta gutxira udal brigadako langileek ahalik eta azkarren moztu dute ura, eta udalsareko langileak egin beharreko konponketak egiten ari dira. “10 bat minutuan ura kenduta zegoen. Orain ikusi egin beharko da kolpeak egokitzailea bakarrik hautsi duen edo ura ixteko giltza edo hoditeria ere derrigortu dituen”.
Ura moztu badute ere, etxebizitzetara ura ailegatzen dela azpimarratu dute udal ordezkariek. “Hiruzpalau eraikin ur barik geratu dira. Alde Zaharreko beste hoditeria batetik desbideratu dute uraren zerbitzua. Baliteke ur txorrota irekitzean ura zikin agertzea, baina iturria une batez zabalik utzita etorriko da garbia”.
Uragaz herritarren batek aparteko gorabeherarik baldin badu, Bilbao Bizkaia Ur Partzuergoko 94-487 31 87 telefono zenbakira deitzea gomendatu dute. “Urik ez badute, urak ohiko presioa baino gutxiago badu edo edozein zalantzagaz deitzeko eskatu dute”.