Ondarroan estropada bana irabazi dute Ondarroak eta Isuntzak
Ondarrutarrak alebin mailako emakumeetan izan ziren nagusi. Isuntzakoak, berriz, txiki mailako emakumeetan azkarrenak izan ziren. Beste hainbat kategoriatan ere aurreneko postuetan ibili ziren eskualdeko ordezkariak.
Ondarroan lehiatutako batel jardunaldia. Argazkia: Ondarroako Kirolaren Leihoa Bizkaiko Batel Ligaren laugarren jardunaldia lehiatu zuten zapatuan [martxoak 7] Ondarroan. Bizkai osotik etorritako alebin, txiki, kadete eta gazte mailako 95 batel ibili ziren Artibai ibaian gora eta behera. Jokatu ziren zortzi estropada horietatik bi irabazi zituzten Ondarroako eta Isuntzako arraunlari gazteek.
Alebin mailako neskak izan ziren erlojupeko proban lehenak uretaratzen. 500 metroko ibilbidea egiten azkarrena Ondarru A batela izan zen; 3 minutu 8 segundo eta 73 ehuneneko behar izan zuen proba amaitzeko. Helmugaratzen bigarrenak ere ondarrutarrak izan ziren. Ondarru B batelak bost segundo eta erdi gehiago behar izan zituen; 3.14,21tan amaitu zuen proba. Lutxanako taldea izan zen podiuma osatzen azkena. Lekeitioko Isuntza A batelak, bestalde, laugarren amaitu zuen.
Uretaratzen hurrengoak alebin mailako gizonezkoak izan ziren. 3.28,72tan amaituta, Arkote izan zen azkarrena. Isuntza izan zen bigarrena, ia bost segundo beranduago (3.28,72) amaituta. Ondarru Bk osatu zuen podiuma (3.35,85). Mundaka eta Elantxobe Ak ere estropada ona egin zuten. Laugarren eta bosgarren amaitu zuten, hurrenez hurren.
Txiki mailakoek, berriz, 1.000 metro ibilbidea osatu behar izan zuten. Emakumeetan bi luze eta ziaboga egiten azkarrenak Isuntzakoak izan ziren. Lehen luzean azkarrenak izan ez baziren ere, ibilbidea amaitzen lehenengoak izan ziren; 5.47,52 behar izan zuten proba amaitzeko. Ondarru B helmugaratu zen bigarren (5.49,74)eta Lutxana izan zen hirugarren. Txiki mailako gizonezkoen lehian Deustu A izan zen onena; 5.12,34tan osatu zuten estropada. Isuntza B izan zen bigarrena (05.15,44) eta Ondarru B hirugarren (05.25,50). Elantxobe podiumetik kanpora geratu zen. Laugarren amaitu zuten (05.32,72).
Kadeteen txanda izan zen jarraian. 1.500 metroko ibilbidea egin zuten, bi luze eta ziaboga bategaz. Emakumeetan Kaiku izan zen azkarrena. Kaiku A batelak 08:10,35tan amaitu zuen estropada. Isuntza C eta Isuntza A izan ziren, hurrenez hurren, bigarren eta hirugarren. Isuntza Cri 21 ehunenekogatik ihes egin zion garaipenak (08.10,56). Lehen luzean aurretik ibili ziren lekeitiarrak, baina ziaboga hartu eta gero, erritmoa bizitu zuten Kaikuko arraunlariek. Isuntza Ak, ostera, hirugarren (08.16.68) amaitu zuen. Ondarru C, E eta A batelek, bosgarren, seigarren eta zazpigarren amaitu zuten, hurrenez hurren.
Kadete mailako gizonezkoetan ere erakustaldi ederra eman zuten bertoko arraunlariek. Deusto C izan zen azkarrena; 07.26,51tan amaiatu zuten proba. Ondarru C izan zen bigarren, proba 07.30,95tan amaituta. Kaiku izan zen hirugarren sailkatua (07.35,10).
Azkenik, gazte mailakoen txanda izan zen: 2.000 metro egin behar izan zituzten arraunean Emakumezkoen kategorian ez zen bertoko ordezkaritzarik egon. Parte hartu zuten hiru batelen artean azkarrena Kaiku izan zen. Hiru luze eta bi ziaboga 11.32,15tan amaitu zuten. Gizonezkoetan, aldiz, Lea-Artibaiko ordezkaritzarik ez zen egon, baina Busturialdeko hainbat batelek parte hartu zuten. Deustu A izan zen azkarrena. Hiru luzeak amaitzeko 09.43,45 behar izan zituen. Bigarren Zierbena A (09.56,40 )eta hirugarren Bermeo B (10.15,52) izan ziren.
