Lagunarteko partida jokatu dute Lekeitioko Beteranoen Txapelketako pilotariek Gartzaronen
Aurten ere, txapelketan parte hartzen duen Mikel Jaunarena nafarraren herrira joan dira bisita kulturala egin eta lagunarteko partida bat jokatzera.
Torneoa Latasako frontoian. Argazkia: Julian Arrate Asteburu honetan ez da jokatu Beteranoen Trinketeko Txapelketako partidarik Lekeition. Horren ordez, Gartzaronera (Nafarroa) joan dira partaideak bisita kulturala egin eta lagunarteko partida bat jokatzera. Herri horretakoa da 2015 urtetik txapelketan parte hartzen duen Mikel Jaunarena pilotaria, eta bere “esfortzua eta kemena” aintzat hartuta, adiskidetasun bisita egin nahi izan diote gainerako pilotariek.
“2017 urtean hasi ginen bisitekin, domekero lau ordu inguru bidean egiten dituela eskertzeko. Ekintza kulturala izaten da, eta laugarrenez eskuzko txapelketa antolatu da Lekeitioko bikoteak eta Gartzaron inguruko bikoteren bat sartuta”, azaldu dute. Horrela, aurten, Lekeitioko trinketeko txapelketako hiru bikotek eta Alex eta Aritz Latasakoek parte hartu dute lagunarteko norgehiagokan.
Denek denen kontrako ligaxka jokatu ondoren Elgoibarko Etxeberria eta Lekeitioko Arrate eta Gartzarongo Jaunarena eta Mendaroko Egaña ailegatu ziren finalera. Norgehiagoka estua eta emozioz betea jokatu zuten bikoteek, eta tanto batzuk eztabaida ere eragin zuten. “Aurrean Jaunarena bikain aritu zen, baina Etxebek ere tanto politak eginez aurrea hartu zuen. Atzean ere sendo eta seguru ibili zen Arrate, eta Egaña oreka mantentzen saiatu zen”.
Torneoko partaide eta antolatzaileak. Argazkia: Julian Arrate
Borrokatua. Markagailua pareko mantendu zen, baina Etxeberria eta Arrate aurretik joan ziren 11ko berdinketara arte. “Azken tantoa borrokatua izan zen, eta Jaunarenak ezkerrera bidali zuen atzeratutako pilota ezin izan zuten eraman Etxeberriak eta Arratek”. Horrela, laugarren urtez jarraian Jaunarena izan da txapelketako irabazlea, eta iaz Egañagaz bikotean lortutako garaipena errepikatu dute.
Xabier Iturriotz Zapa Imotzeko kirol zinegotziak egin zituen epaile lanak, eta sari banaketan Julen Beunza Basaburuako kirol zinegotziak eta Andrea Alderegia Latasako pilotariak parte hartu zuten.
Domeka goizean [martxoak 8] Eltsoko Erlezaintza museoa bisitatu zuten, eta Gartzaroneko Toki Alai elkartean amaitu zuten aurtengo bisita. Nafarroako lagun eta Imoz eta Basaburuko agintariek egindako harrera eta laguntza eskertu dute Lekeitioko txapelketako pilotari eta antolatzaileek.
Zinegotziei eskerrak eman zieten Lekeitioko txapelketako kamisetak oparituz. Argazkia: Julian Arrate
Azken txanpa. Beteranoen Txapelketak eguenean [martxoak 12] jarraituko du. Atzeratuta geratu zen finalaurrekoko partida jokatuko da 20:00etan, Martin-Foster eta Beraza-Telleria bikoteen artean. Azken horrek, iazko azpitxapeldunak direla faboritoak diote txapelketaren antolatzaileek, baina Martin eta Foster lekeitiarrak ere sasoi onean daudela azpimarratu dute, eta ezustekoa ematera irtengo direla iragarri dute.
