Markina-Xemeinen kultura "sustatu eta bultzatzeko" hitzarmena sinatu dute udalak eta Uhagonek
Hitzarmena sinatuta, aurrerantzean Uhagon kulturguneak udalagaz adostu beharko du programazioa. Bi aldeek ordezkari bana izendatuko dute, bien arteko "komunikazioa errazteko".
Uhagon kultur elkarteko ordezkariak eta Luis Egurrola Markina-Xemeingo alkatea, hitzarmena sinatzen. Argazkia: Markina-Xemeingo Udala Markina-Xemeingo Udalak eta Uhagon kulturguneak herrian kultura “sustatzeko eta bultzatzeko” lankidetza hitzarmena sinatu dute. Hitzarmenak abenduaren 31ra arteko iraupena dauka. Orain arte legez, aurrerantzean ere, Uhagonek izaera kultural, artistiko edo antzeko izaerako zerbitzuak, ekintzak eta ikastaroak antolatzen jarraituko du, baina programazioa udalagaz adostu beharko du, ekintzak kulturgunean bertan edo herri mailan badira ere.
Hitzarmenak dio, programazioa udalagaz adosteko derrigortasuna edukita ere, ekintza eta zerbitzuen kudeaketa, koordinazioa eta gauzatzea Uhagonen esku egongo dela. “Kulturgunearen erabilera, kudeaketa eta ustiapena Uhagon Kultur Elkartearen esku egongo da. Udalaren lana izango da azpiegitura horietan mantentzen lanak eta obra txiki zein handiak egitea.
Gastuak kudeatzeko modua ere zehaztu dute bi aldeek. “Fakturak Uhagonen izenean igorriko dira, eta ordainketa ere elkarteak egingo du. Ondoren, Uhagonek hilean hileko programazio gastuen faktura aurkeztuko dio udalari, eta azken horrek hileko programazioan sartutako ekintzek eragindako gastuak ordainduko dizkio”. Udalak elkarteari ordainduko dizkion hileko faktura horiek “gehienez ere” hilabeteko epean ordainduko dizkiola esan dute. Udalak “gehienez ere” 40.000 euroko diru saila gordeko du urteko aurrekontuan, hileroko ordainketa horiek bermatzeko. “Diru sail horretatik kanpo geratzen dira ospakizun bereziak eta kultur elkarteak udalagaz elkarlanean antolatu ditzazkeen ekitaldi desberdinak (Gabonetako egitaraua, inauterietakoa, Karmen jaien barruan antolatutako ekintzak…).
Urteroko diru sail horrez gain, bi erakundeek kultur arloan eskatu ahal diren diru laguntzak identifikatu eta horiek eskatzeko konpromisoa hartu dute.
Uhagonek antolatutako ekintzetatik zein elkarteak kudeatzen dituen guneetatik diru sarrerak baleude, horiek programazioa bultzatzera bideratuko direla ere adostu dute.
Udalak bere eskumenean dauden azpiegiturak uzteko konpromisoa ere hartu du elkarteagaz. Hala, Uhagon kulturguneak udal pilotalekua, kultur aretoa, Esperantza aretoa edo antzerakoren bat beharko balu, eskaera egiteko prozedura arrunta jarraitu eta udalak erabiltzeko baimena emango lioke.
Bi erakundetako ordezkarien arteko harremana “zuzena” izango dela esan dute; alde bakoitzetik ordezkari bat izendatuko dute, “komunikazioa errazteko”. “Udala unean uneko eta behar den guztietan bilduko da Uhagon kultur elkarteko arduradunekin, bi aldeen arteko elkarlana indartzeko eta horri jarraipena egiteko. Beraz, udalak, Uhagonegaz batera, aktiboki parte hartuko du programazioa egiterakoan”. Bi aldeen proposamenak kontuan hartzeko eta erabakiak ere bi aldeen artean hartzeko konpromisoa hartu dute. “Erabakiak hartzeko orduan, proposamenen balio artistikoa eta bideragarritasun ekonomiko eta teknikoa hartuko da kontuan, besteak beste”.
Hiru hiletik behin, gainera, aurreko hiruhilekoaren balantzea eta hurrengo hiruhilekoaren proposamena aurkeztuko dituztela esan dute.
