Instagrametik kontzertu bat antolatu du Ondarroako Udalak
Herriko hainbat musikarik zapatu arratsaldean emango dute kontzertua. 18:30etik aurrera, gailuetako pantailak bat-bateko kontzertu areto bihurtuko dira.
Alarma egoeran egotea ez da erraza. Egunotan Interneten ekimenak ugaritzen ari dira herritarren konfinamendu egoera arintzeko, eta bide horretatik, Ondarroako Udalak ere sarean bestelako kultur proposamena antolatzea erabaki du. Udalaren Instagram kontuaren bitartez (@udalbarriak), hain zuzen, zuzeneko kontzertua emango dute herriko hainbat musikarik zapatu [martxoak 28] arratsaldean, kontzertu aretoa norbere etxea bihurtuz minutu batzuez.
Udal iturriek azaldu dutenez, eta herritarrek etxean denbora asko pasatu behar dutela jakinda, jendea entretenitzeko beste era bat izan daiteke zapatuko kontzertua. “Kultur agenda bertan behera geratu da, eta kulturak ere bere espazioa izan dezan, ideia ona iruditu zaigu leku hori herriko musikariekin betetzea”.
18:30ean hasiko da lehen zuzenekoa, eta saioagaz gozatu nahi dutenek Ondarroako Udalaren @udalbarriak Instagram kontuarekin bat egin beharko dute. Aurreratu dutenez, ordubete inguruko saioa izango da; hamar bat minutuka, artistak txandakatzen joango dira ikusleen pantaila aurrean. “Artistek eurek aukeratutako pare bat kantu eskainiko dituzte”. Markos Untzetak eskainiko du lehenengo zuzenekoa, eta haren atzetik, Patxi Saiz, Biren, Keu Agirretxea eta Irai taldeko Kaba joango dira txandakatzen. Kontzertua Ion Kirru Iparragirreren ahotsak agurtuko du.
Udalak, bestalde, antzerako beste ekimen batzuk prestatzen hasita dagoela iragarri du, eta konfinamendu egoerak irauten duen tartean antzeko emanaldiek jarraipena edukitzea espero du. “Herritarrekin sormena lantzeko eta antzeko proiektu batzuk egingo ditugu. Herritarren batek teknologia berriak erabilita udaletik gauzatu daitekeen ideia berriren bat baldin badu, ideia hori ongietorria izango da. Proposamenen bat dutenak sare sozialen bitartez edo komunikazioa@ondarroa.eus helbidera posta elektroniko bat bidalita jar daitezke gurekin harremanetan”.
