10.974 langabe gehiago daude martxoan osasun krisiaren ondorioz
Azken hilean sektore guztietan egin du gora langabeziak, baina batez ere zerbitzuen arloa da kaltetuena; 7.947 langabe gehiago ditu.
Borja Belandia Fradejas
Lanbide-Euskal Enplegu Zerbitzuko zuzendari nagusia. Argazkia: Irekia Gaur [apirilak 2] goizean azaldu dutenez, Covid-19 pandemiaren eraginak agerian dira, lehenengoz, EAEko lan merkatuan.
Borja Belandia Lanbideko zuzendariak azaldu duenez, langabezia datuen barruen ez dira sartzen aldi baterako erregulazioan daudenak, langile horiek teknikoki ez daudelako langabezian. Atzora arte, 140.000 pertsonei kontratua aldi baterako eteteko eskaerak jaso zituen Lanbidek. Horiei Lanbiden erregistratutako langabezia zerrendan izena eman duten 10.974 horiek gehitu behar zaizkie. Hala, martxoaren amaieran 128.213 langabe zeuden Bizkai, Araba eta Gipuzkoan.
Belandiaren arabera, azken hilean sektore guztietan egin du gora langabeziak, baina batez ere ostalaritzan, janarien eta edarien banaketan, eta merkatari txikietan. Jarduera bakar batean handitu da enplegua, zaharren egoitzetan eta antzekoetan; horietako askotan kanpoko langileak kontratatu behar izan dituzte gaixotu direnak edo berrogeialdian jarri direnak estaltzeko.
Langabeziak gora egin du hiru luraldeetan: 5.793 gehiago Bizkaian, 3.072 gehiago Gipuzkoan eta 2.109 gehiago Araban. Generoei erreparatuz, krisiaren eragina gizonen artean da nabariagoa (% 11,85), emakumeen artean baino (% 7,43).
Gaur goizean esan dutenez egungo krisiaren eragina martxoaren 12an hasi zen nabaritzen. Ordura arte, joera positiboa zen: “Egoera hau gertatu izan ez balitz, 2.000 langabe gutxiagorekin amaituko genukeen hilabetea”.
Aurrera begira. Borja Belandiak azaldu duenez, Lanbide eta Eusko Jaurlaritzako Enpleguko eta Gizarte Politiketako Saila aurrera begira ari dira lanean. “Euskal enpresek beren jarduerari berrekiten diotenean ikusi ahal izango dugu egoera honek lan-merkatuan izan duen egiazko eragina zein izan den. Datorrenari aurrea hartu behar diogu, neurriak ezarriz eta esku-hartzeak gauzatuz ahalik eta langile gehien ahalik eta epe motzenean buelta daitezen lan-merkatura”.
Zentzu horretan, Enpleguko eta Gizarte Politiketako sailburu Beatriz Artolazabalek Gobernu Kontseiluak datorren asteartean onartuko dituen bi neurri aurkeztuko ditu: “Bata, autonomoentzako iragarri dugun laguntza-ildoa da, gizarte segurantzako kuotak eta alokairuak ordaintzea du xede eta 3 milioi eurokoa izango da. Bestea, 6,5 milioi euroko deialdi bat da, udaletxeek Lanbide-Euskal Enplegu Zerbitzuan eta Gazteentzako Berme Sisteman izena emanda duten gazteak kontrata ditzaten. Beren enplegagarritasuna erraztea da xedea, eskarmentu profesionala lortuko baitute”.
