60 egun beteko dira Zaldibarko zabortegia erori zenetik
Gaia berriro erdigunera ekartzeko ekimenak antolatu ditu Zaldibar Argituk datozen egunetarako. 5 minutuko burrunbada deitu dute astelehenerako, besteak beste.
Hilabete bi beteko dira astelehenean Zaldibarko Zabortegia amildu eta Joaquin Beltran eta Alberto Sololuze bertako langileak azpian harrapatu zituenetik. Markina-Xemeingo bizilaguna eta Zallakoa desagertuta daude oraindik, eta gertaerari buruzko aldarrikapen eta kezkek ere, oraindik erantzunik barik jarraitzen dutela uste du Zaldibar Argitu herri plataformak. Hori dela eta, gaia berriro erdigunean jartzeko eguna izango da apirilaren 6a, erreklamazio horiek berriro ere ozen entzunaraztekoa.
Data esanguratsu horren harira, ekimen batzuk abiaraziko ditu egunotan herri ekimenak. Alde batetik, herri ezberdinetako plataformetako kideek parte hartuko duten bideoa zabalduko dute gaur [apirilak 3] sare sozialen bidez, Zaldibar Argitu plataformaren aldarrikapenekin eta apirilaren 6rako prestatu dituzten ekimenen azalpenagaz. Apirilaren 6an balkoiak eta leihoak apaindu eta 20:30ean, 5 minutuz burrunbada egiteko deia luzatu diete Euskal Herritar guztiei. “Burrunbadaren ondoren, kandela bi edota bestelako argiak piztuko ditugu Joaquin eta Albertoren omenez”. Horrez gain, Debabarreneko musikariek prestatu duten bideoklipa ere estreinatuko dute bezperan.
Isilago. Koronabirusaren krisiak gaurkotasuneko gaien lehen lerrotik aldendu du Zaldibarko zabortegiko gertaera. Hala ere, Zaldibar Argitu herri plataformako kideek lanean jarraitu dute. Hondamendia gertatu zenean, plataformak sortu ziren Markina-Xemeinen, Ermuan, Eibarren, Zaldibarren, Elgetan eta Zallan. Guztiak koordinazio mahai batean batzen dira.
“Apirilaren 6rako zerbait berezia prestatu nahi izan dugu. Gure helburua, azken finean, gaia ez ahaztea da, bizirik mantentzea”
Aitortu dutenez, krisi honek guztia hankaz gora jarri du, baita plataformak ere. Antolatzeko baldintzak oso desberdinak dira orain edo duela hilabete. Hala ere, konfinamendutik ere gaia sozializatuta edukitzen saiatu direla azaldu dute. «Kazola jotzeak egin ditugu, balkoietan jartzeko ekimen ezberdinak, eta apirilaren 6rako zerbait berezia prestatu nahi izan dugu. Gure helburua, azken finean, gaia ez ahaztea da, bizirik mantentzea».
Egoerak oraindik ere bere horretan jarraitzen du Zaldibar Argituren iritziz. «Gure lehen kezketako bat bazen langile biak hortik ahalik eta lasterren ateratzea eta zabortegian zer ari ziren egiten gardenki azaltzea; ez dute bete. Gure eskaeretako bat ere bazen Jaurlaritzak eta aldundiak baliabide guztiak edo ahalik eta baliabide gehien bilaketara bideratzea, eta ez dakigu zenbat bideratu duten. Eta, zabortegi horretan zer dagoen eta horregaz zer egingo duten ere ez dute argitu».
Datuak publikatzeko eduki duten modua ere, webgunean jarritako grafiko eta estatistiken bidez, ez dela oso argia diote, eta komunikazio aldetik ere hutsuneak nabaritu dituzte. «Baina ez daukagu informazio hori oso argi. Ikusi dugu kontu horiek guztiak erantzun zehatzik barik daudela, eta ez digutela kasurik egin. Saiatu dira kontua ahalik eta arinen ahazten».
“Eskandalu bat izan zen hor gertatutakoa, eta bi hilabete igaro diren arren, ikusi dugu dimisio bat bera ere ez dela jarri mahai gainean”
Erantzukizun politikoak ere eskatu ditu plataformak. «Iruditzen zaigu Verter Recycling enpresaren erantzukizunak bide judizialetik argituko direla, baina kargu publikoak dituztenek demokratikoki dimititu beharko lukete, osasun demokratiko hutsagatik. Eskandalu bat izan zen hor gertatutakoa, eta bi hilabete igaro diren arren, ikusi dugu dimisio bat bera ere ez dela jarri mahai gainean, eta hori oso larria da».
Koronabirusaren gaiak hartu duen garrantziaren ondorioz, Zaldibarko hondamendia komunikabideetan gutxiago agertu izanak jendearen erantzunean eragina izan duela ere igarri dute. «Balkoietan ekimen pila egin dira gainera, salaketa ezberdinak egiteko, indarkeria matxista salatzeko, osasun langileei txalo egiteko, badaude gauza pila bat, eta, beraz, badago sentsazioa jendeak ia ez dakiela zer den, zer ez den, eta hori ere kontuan hartu beharrekoa da». Hala ere, oraindik ikusten dute jendeak gaia jarraitzen duela eta interesa azaltzen duela. «Hau guztia pixka bat normaltasunera bueltatzen denean, pixka bat lasaitzen denean, berriz martxan jartzeko baldintza nahikoa badaudela ikusten dugu, eta jendearen aldetik gogoa ere bai».
Senideen ondoan. Jakinarazi dutenez, kontaktuan daude Alberto eta Joaquinen familiekin. «Senide pare bat dira plataformako kideak eta haiek daude gainontzeko familiarrekin hartu-emanetan. Eurekin hitz egiten dugu, eta egiten ditugun gauzak komunikatzen dizkiegu. Pixka bat koordinatzen saiatzen gara, senideen aldetik ere mobilizazio batzuk deitzen dituzte eta. Gure lana eta eurena ez estaltzen saiatzen gara». Apirilaren 6an ere, elkarregaz aterako dute aldarria kalera, «gertaera ahanzturan erori ez dadin».
