Herritarren elkartasuna txalotu du Lekeitioko EH Bilduk
Bideo bat kaleratu dute eskerrak eta animoak emateko. Aipamen berezia egin diote 'Lekittarrok zaindu' sare herritarrari.
Herritarrei besarkada bat helarazi eta eskerrak emateko bideo bat zabaldu du Lekeitioko EH Bilduk. Mundu osoko krisi hau, osasun krisitzat jo den arren, krisi bakarra ez dela esan dute, eta horrek oraindik ere nabariago utzi dituela gizarte modura dauden gabeziak. “Momentuz osasunarena da bizi dugun handiena, baina ez dezagun ahaztu hor ditugula krisi ekonomikoa eta soziala. Zaintza arazoa litzateke handienetarikoa, handiena ez bada. Eta hortxe kokatu behar ditugu gabezi handiak dituzten herritar multzoak: pertsona nagusiak, zailtasun ekonomikoak dituztenak, gaixorik daudenak, bakardadean bizi direnak, etxean 24 orduz bere erasotzaileagaz bizi behar direnak, prekarietatean egiten dutenak beharra, kontratu bako beharginak eta abar”.
Konfinamendu epeak luzatzerakoan beharrizanak eta laguntza eskaerak gehitu direla ikusten dute, eta horren aurrean elkartasuna eta elkarlana dira EH Bilduren esanetan bitarteko egokiena eta eraginkorrena. “Herriko eragile eta ekimen ezberdinetako jendeagaz gabiz harremanetan eta esan genezake ibili badabiltzala eten barik ekinean. Gure esker ona erakutsi nahi diegu osasun etxeko beharginei, Gurutze Gorrikoei, udal brigadakoei, nagusien egoitzakoei, herriko denda eta ostalaritzako behargin eta autonomoei, kale garbiketan ari direnei eta konfinamendu arauak betetzen ari zaretenoi”.
Aipamen berezia egin diote Lekittarrok zaindu sare herritarrari. “Berau be bada-eta ekinean dabilen herritar boluntario talde zabala, nahiz eta erakunde publikoek ez deutsen aitortzen eta onesten euren lana behar dan modura. EHBildukook gainerako guztiekin modura, eurekin be bagabiltza eta esateko modura gagoz ikaragarrizko lana dabiltzala egiten. Gure txalo zaparrada eurentzat”.
Iluntzeetako ekimenak eta irudimenez beterikoak ere eskertu dituzte, “alaitasun pixka bat ematen digute eta”, eta EH Bildukoek udal gobernuari ekarpenak egiten, iradokizunak eskaintzen, estrategiak zorrozten eta beste eragileekin hartu emanetan ari direla eta jarraituko dutela azpimarratu dute. “Herri bat gara, komunitate bat osatzen dugu eta denok daukagu denon beharra”.
