COVID-19arekin kutsatutako kasu bat gehiago erregistratu dute Markina-Xemeinen
Gainerako herrietako datuak bere horretan mantentzen dira. Gaur goizean osasun arlo pribatuko profesional bat hil dela esan dute. "Beste patologia bat zeukan, baina COVID-19aren proban positibo eman zuen". Bestalde, Eusko Jaurlaritzako Osasun Sailak eta Osakidetzak Maia izeneko laguntzaile birtual bat jarri dute euren webguneetan, "herritarrek eduki ahal dituzten zalantzak argitzen laguntzeko".
Beste bat gehiago Markina-Xemeinen. COVID-19arekin kutsatutako eta erregistratutako kasuak banaka ari dira gehitzen Lea-Artibain eta Mutrikun, Markina-Xemeinen batik bat. Gainerako herrietako datuak ez dira aldatu azken 24 orduetan. Bizkai, Gipuzkoa eta Araban hildakoen kopuruak gehitzen jarraitzen du, baina datuak ez dira duela aste batzuetan bezala igotzen. “Motelago doaz”. Gaur [apirilak 4] emandako datuen arabera, ondokoa da kutsatuta daudenen kopurua eskualdean:
- Markina-Xemein: 10 positibo (1 gehiago azken 24 orduetan)
- Mutriku: 6 positibo (aurreko eguneko datu bera)
- Lekeitio: 6 positibo (aurreko eguneko datu bera)
- Ondarroa: 5 positibo (1 gehiago azken 24 orduetan)
- Etxebarria: 2 positibo (aurreko eguneko datu bera)
- Mendexa: 1 positibo (aurreko eguneko datu bera)
- Berriatua: 1 positibo (aurreko eguneko datu bera)
Bizkai, Gipuzkoa eta Araban 8.187 dira zenbatutako positiboak (atzo baino 360 gehiago). Hiru lurraldeetan ospitaleratuta daudenak 1.858 dira (atzo baino 17 gehiago). Azterketa lurraldeka eginez gero, ondokoak dira datuak:
- Araba: 2.539 positibo (92 gehiago azken 24 orduetan) / 319 ospitaleratuta (atzo baino 6 gehiago)/184 hildakoak (+17)
- Bizkaia: 4.224 positibo (200 gehiago azken 24 orduetan) / 1.177 ospitaleratuta (atzo baino 16 gutxiago) / 224 hildakoak (+19)
- Gipuzkoa: 1.424 positibo (68 gehiago azken 24 orduetan) / 362 ospitaleratuta (atzo baino 27 gehiago)/ 69 hildakoak (+6)
Gaur goizean, gainera, osasun arlo pribatuko profesional bat hil dela esan du Mikel Sanchez Osasun Saileko Plangintza, Antolamendu eta Ebaluazio Sanitarioko zuzendariak. “Beste patologia bat ere bazuen, baina COVID-19aren proban positibo eman zuen”. Azken egunotan profesionala Gurutzetako Unibertsitate Ospitalean ospitaleratuta egon dela esan du. “Osasun Sailak eta Osakidetzak doluminak eman dizkiete familiari eta gertukoei”.
Kanal berria. Eusko Jaurlaritzako Osasun Sailak eta Osakidetzak chatbot bat jarri dute abian euren webguneetan, koronabirusaren inguruan herritarrek izan ditzaketen zalantza nagusiak argitzeko. Komunikazio digitaleko kanal berri horrek lehendik dauden informazio kanalak osatzen ditu, hala nola webgunea bera, COVID-19.eus aplikazioa eta Osasun Aholkuaren telefono kanala (900 20 30 50).
Maia izeneko laguntzaile birtual hori automatikoki zabalduko da webgunearen beheko eskuinaldean. “Informazio kontsultei arintasun handiagoa emango die, galdera zehatzei hizkuntza naturaleko elkarrizketa baten bidez erantzunez”. Gaixotasunaren sintomei eta izandako kontaktuei buruzko autotest bat egiteko aukera ematen dio herritarrari, une bakoitzean egokienak diren gomendioak emanez. Horrez gain, galdera ohikoenak erantzungo ditu, euskaraz zein gaztelaniaz.
Sanchezek azaldu duenez, Osasun Sailak eta Osakidetzak “ahalik eta interakzio bide gehien eskaini nahi” dizkiete herritarrei, gaixotasunaren inguruan dituzten zalantzak argitzeko.