Pablo Fdez. Arrieta markina-xemeindarrak kontzertua emango du Facebook bidez
Saioa Uhagonek antolatu du, eta zapatuan [apirilak 25] izango da, 20:30etik aurrera. Giro alaia sortzen saiatuko dela aurreratu du musikariak, eta abestien aukeraketa berezia egiten ari da.
Pablo Fdez. Arrieta grabazio egunean. Argazkia: Josu Arrate 'Txorixe' Markina-Xemeinen hilero egoten den kultur egitarauari jarraipena emanez Pablo Fdez. Arrieta musikariaren kontzertua antolatu du Uhagon Kultur Elkarteak zapaturako [apirilak 25]. Facebook bidez jarraitu ahalko da kontzertua, 20:30etik aurrera. Markina-Xemeingo musikariak aitatu duenez, era horretara egiten duen lehen saioa izango da, eta prestatzen hasita dago.
Hasiera batean etxeko egongela prestatu zuen zuzenekoa egiteko, baina etxean daukan konexioagaz ezin dezake egin. “Facebook Life egiteko ez daukat nahiko indarrik, eta beste leku batean egiteko baimena eskatu dut”. Horrela, udaletxe zaharretik egingo du zuzenekoa, eta Txorixe Bideoak-eko Josu Arrate izango du laguntzaile. “Esperimentua izango da, baina kalitatezko emanaldi bat eskaintzea da asmoa”.
Kontzertuko egitarauari dagokionez, momentu triste honetan giro alaia sortzen saiatuko dela aurreratu du, “naiz eta nire musika nahiko malenkoniatsua izan”. Hori dela eta, doinuen aukeraketa berezia egiten ari da, “bihotzetik ateratzen dena”. Besteak beste Agustin Barrios Paraguaiko gitarra-jotzaile eta konpositorearen kanta bat joko du, baita bolero batzuk eta jazz standar batzuk ere.
Pablo Fdez. Arrieta konpositore, musikari eta musika irakaslea ere bada, eta, beste asko bezala, etxetik ari da lanean. “Ez naiz sare sozialen zalea, baina etorkizunak bide horretatik garamatza, eta klaseak ematen ari naiz bide horietatik. Oztopoak gainditzeko dira eta egingo dugu aurrera”. Musikari modura aurreikusita zeuzkan emanaldi batzuk bertan behera geratu zaizkio, baina, bitartean, doinu berriak sortzen eta aztertzen ari dela aurreratu du, “hurrengo, jendeari, gauza berriak eskaintzeko”.
