Yolanda Larreategi markina-xemeindarrak irabazi du Peru Abarka Album Lehiaketa
Aurten 21 lan aurkeztu direla jakitera eman dute antolatzaileek, iaz baino 9 gehiago. 'Bi txantxangorri haritz adarrean' narrazio "indartsua eta sentikorra" dela esan du epaimahaiak.
Yolanda Larreategi Duralde idazlea. Argazkia: Yolanda Larreategi Duralde Nazioarteko Liburuaren Eguna dela baliatuta, 2020ko Peru Abarka Album Lehiaketako narrazioen ataleko irabazlea jakitera eman du gaur [apirilak 23] Markina-Xemeingo Udalak. Saria herrian geratu da aurten. Yolanda Larreategi Duralderen (Markina-Xemein, 1979) Bi txantxangorri haritz adarrean narrazioari eman diote saria.
Aurten 21 lan aurkeztu direla jakitera eman dute antolatzaileek, iaz baino 9 gehiago, eta epaimahaikideak Patxi Zubizarreta idazlea, Iñaki Aldekoa Erein argitaletxekoa eta Marieli Ituarte izan dira. Larreategiren narrazioa “indartsua eta sentikorra” dela azaldu du epaimahaiak. “Narratzailea zuka ari zaio Magiri, beste protagonistari, baina zuka horretan irakurleok ere barne hartzen gaitu eta interpelatuta sentitzen gara une oro”.
Oso txukun idatzita dagoela eta garapen argikoa dela ere gaineratu dute. “Narrazioan bi gai nagusitzen dira, eta biak ere sentiberatasun handiz daude garatuta. Bi gai horiek dira ipuinaren indargunea, gure gizartean biek ala biek tabu izaera gordetzen baitute gaur egun ere”. Bi gai horiek zeintzuk diren ez dute aipatu nahi izan, “narrazioan barneratu eta deskubritu egin behar direlako, idazleak egin dituen hitz joko eta baliabideen artean”.
Bigarrenez irabazi du Peru Abarka Lehiaketa Larreategik. 2006an, lehenengo Peru Abarka Album Lehiaketan, Zaharrak berri, euriak lanagatik saritu zuten. Orduan, Elena Odriozolak ilustratu zuen albuma. Orain, Bi txantxangorri haritz adarrean narrazioaren ilustratzailea zein izango den aukeratzeko, ilustratzaileen atala zabalduko dute. Datozen egunetan kaleratuko dituzte bigarren fase horretako oinarriak.
