Markina-Xemeinen ez da ohiko Karmen jairik ospatuko
Gaur gaurkoz jaiak arriskurik barik ospatzeko aukerarik ez dute ikusten. Beste ekimen batzuk antolatzeko prest agertu da udala.
Koronabirusak eragindako osasun krisia dela eta, Markina-Xemeingo Karmen jaiak beste era batekoak izango dira aurten. Ohiko jaiak bertan behera uztea erabaki du udalak. Markina-Xemeingo Udalean ordezkaritza daukaten alderdi politiko biek aztertu dute gaia Tokiko Gobernu Batzarrean, eta bertan hartu dute erabakia.
Azaldu dutenez, gaur gaurkoz segurtasun eta higiene neurriak ez daude bermatuta jaiak arriskurik barik ospatu ahal izateko. Beraz, jaiak mantentzea ez litzatekeela arduratsua izango esan dute. Hori dela eta, “jendearekiko arduragatik eta osasun publikoa bermatzeko”, ohiko jaien antolakuntza bertan behera uztea erabaki dute. “Udalak adierazi nahi du erabakia hartzea oso zaila izan dela, Karmen jaiak urteko ekitaldi garrantzitsuena eta pizgarri ekonomiko handia direlako herrian”.
Hala ere, beste era bateko jaiak ospatzeko aukerari ateak zabaldu nahi izan dizkiote. “Betiko moduan ospatuko ez badira ere, bestelako ekimenak antolatzea da udalaren asmoa, beti ere momentuko egoera kontuan edukita”. Horretarako herriko taldeengana zuzendu dira, eta proposamenak eskatu dizkietela azaldu dute. Uhagon kulturguneagaz elkarlanean aritzeko asmoa ere badauka udalak.
Markina-Xemeingo Karmen jaiak uztailaren 15etik 19ra bitartean ziren ospatzekoak.
