Birziklapen tasak gora egin du Debabarrenan
Otsailean 387.985 kilo organiko jaso zituzten (biztanleko 5.33 kilo), eta martxoan 441.744,78 (biztanleko 6,07 kilo). Gaikako bilketan plastikoaren birziklapena nabarmen igo dela diote: "Otsailean 127.920 kilo jaso ziren (biztanleko 1,76 kilo), eta martxoan 151.840 kilo (biztanleko 2,09 kilo)".
Debabarreneko Mankomunitateak jakitera eman duenez, martxoan birziklapen tasa igo egin da eskualdeko zortzi udalerrietan. Guztira, birziklapen tasa %49,63 izan dela esan dute. Martxoa eta otsaila alderatuta, organikoaren bilketa %13,86 igo da, plastikoarena %18,7, beirarena %42,56 eta papera %8,28. Hondakin guztien artean, errefusa %50,37 izan dela esan dute. Herritarren erantzuna “txalotzekoa” izaten ari dela diote Mankomunitateko ordezkariek.
Guztira, martxoan 2.338.316 kilo hondakin batu dituzte; biztanleko 32,13 kilo. Gogorarazi dute, martxoan, alarma egoera ezarri zenetik edukiontzien txipak ezgaituta egon direla herritarren segurtasuna bermatzeko. “Edukiontziak zabalik egonda ere gehiago birziklatu da. Dena dela, oraindik ere birziklapen maila gehiago hazteko aukera dago, eta egungo egoera gainditzen dugunean horretara bideratuko ditugu gure esfortzuak”, dio Iosu Arraiz Debabarreneko Mankomunitateko presidenteak. Hondakinak gutxitu eta sortzen dena ahalik eta gehien birziklatzeko bide hori herritarrekin elkarlanean egin behar dela diote.
Datu zehatzak emate aldera, esan dute otsailean 387.985 kilo organiko jaso zirela (biztanleko 5.33 kilo), eta martxoan 441.744,78 (biztanleko 6,07 kilo). Gaikako bilketan plastikoaren birziklapena nabarmen igo dela diote: “Otsailean 127.920 kilo jaso ziren (biztanleko 1,76 kilo), eta martxoan 151.840 kilo (biztanleko 2,09 kilo)”. Beirari dagokionez, otsailean 127.920 kilo jasotzetik (biztanleko 1,76 kilo) martxoan 182.362 kilo (biztanleko 2,51 kilo) jasotzera pasa da. Azkenik, 231.522 kilo paper jasotzetik (biztanleko 3,18 kilo) 250.695 kilo jasotzera (biztanleko 3,44 kilo) pasa direla gaineratu dute.
Azaldu dute berrogeialdian dagoen kideren bat duten etxeetatik datorren zaborra bereizita kudeatzen dutela. “Une oro lehentasuna eman diogu langileen segurtasunari, eta erabat automatizatuta eta bereizita ari gara hondakin horiek kudeatzen”.
Martxoan gertatu modura, apirilean ere errufusaren kopurua jaitsi egin dela antzeman dute. “Oraindik datu zehatzak ez baditugu ere, paper eta kartoiaren edukiontzian eta edukiontzi grisean (errefusa) jasotako hondakinen beheranzko joera sumatu dugu apirilean”. Dena dela, beherakada hori jarduera ekonomikoaren etetearen ondorioz izango litzatekeela diote, “batez ere ostalaritzan eta gainerako merkataritzan”.
Datu horiekin, hondakin bilketa zerbitzuaren garrantzia “inoiz baino agerikoagoa” dela dio Arraizek. “Ezinbesteko zerbitzua da. Eta langileek erakutsi duten konpromisoa eskertzekoa da. Izan ere, herritarrak etxean konfinatuta dauden bitartean, guztioi bizitza errazagoa egin eta osasuna bermatzeko lanean dihardute”.
