Alarma egoera beste bi astez luzatzea onartu du Espainiako Kongresuak
178 aldeko botogaz onartu da laugarren luzapena. Ondokoek eman dute aldeko botoa: PSOE, Podemos, Ciudadanos, PNV, Mas Pais, Coalicion Canaria, PRC eta Teruel Existe. Alarma egoera luzatzeko proposamena babesteko EAJk hiru baldintza ipini dizkio Sanchezi.
Sanchez, gaur Espainiako Kongresuan egindako bozketan. Argazkia: Espainiako Kongresua Alarma egoera maiatzaren 23ra arte (egun hori barne) luzatzeko proposamena egin du gaur [maiatzak 6] Pedro Sanchez Espainiako presidenteak Kongresuan, eta onartu egin dute; laugarrenez onartu dute alarma egoera luzatzea. Dena dela, Sanchezek esan du “printzipioz” beste bi astez luzatuko dela. Izan ere, esan du deseskaladaren fase guztiak amaitu arte alarma egoera indarrean egotea “neurririk eraginkorrena” dela.
- Aldeko botoa eman dutenak (178 boto): PSOE, Podemos, Ciudadanos, PNV, Mas Pais, Coalicion Canaria, PRC eta Teruel Existe.
- Aurkako botoa eman dutenak (75): Vox, ERC, Junts per Catalunya eta CUP.
- Abstenitu direnak (97): EH Bildu, PP, Navarra Suma eta BNG.
Proposamena bozkatzerakoan oztopoak egon zitezkeela jakinda, Sanchez azkar ibili da bozketa egin aurreko orduetan, eta atzoz geroztik akordioa itxi zuen Ciudadanosekin. EAJk, ostera, gaur goizean [maiatzak 6] baieztatu du bere babesa, akordioa itxita. PP alarma egoera luzatzearen kontra bozkatzekoa bazen ere, jarrera aldatu eta zenbait erkidegoetako buruek hala eskatuta abstenitu egin da.
Alarma egoera luzatzeko proposamena babesteko, EAJk hiru baldintza ipini dizkio Sanchezi: pandemiaren aurkako neurriak erkidegoekin adostea eta erkidegoetako presidenteek ezartzea, Madrilek hauteskundeak “erraztea” eta Trebiñun gertutasun irizpideak izatea eta Arabako zerbitzua jasotzea.
Alarma egoera zein egunera arte luzatu duten zalantza sortu da komunikabideen artean. Hori jakiteko, alarma egoera ezarri zen lehen eguna hartu behar da kontuan; zapatu batean sartu zen indarrean (martxoak 14), eta, ondorioz, zapatu batean amaituko da (maiatzak 23), egun hori barne.
Josu Erkoreka Jaurlaritzako eledunak Euskadi Irratian azaldu duenez, Sanchezek baldintzak onartu izana ona da: “Printzipioz notizia ona da, ikusiko dugu gero nola gauzatuko den”.
Mugikortasuna probintziari barik autonomia elkartera mugatzea nahi du Jaurlaritzak. “Malgutasun neurriak onartu beharko dituzte”, esan du Erkorekak. Eta gaineratu du larrialdi egoerak ez duela oztopatzen hauteskundeak egitea.
OMEren oharra. Bestalde, Osasunaren Munduko Erakundeko (OME) Zuzendari Nagusi Tedros Adhanom Ghebreyesusek ohartarazi du konfinamendutik ateratzeko prozesua gaizki kudeatuz gero litekeena dela berriz ere ezarri behar izatea. Hala, Ghebreyesusek konfinamendutik ateratzeko neurriak hartzen ari diren estatuei ohartarazi die konfinamendua berriz ezartzeko aukera “oso erreala” dela eta neurriak tentuz hartzeko eskatu du.
