COVID-19aren gailurrari aurre egiteko hartutako lau arau indargabetu ditu Osasun Sailak
Esan dutenez, egoeraren bilakaera ikusita hartu dute martxoan eta apirilean onartu zituzten ezohiko lau neurri indargabetzeko erabakia. Besteak beste, azoken eta hileten debekuak indargabetu dituzte.
Hain zuzen ere, Nekane Murga Osasun Sailburuak martxoan eta apirilean sinatutako lau arau indargabetu dituzte. Hemen indargabetu dituzten arauak:
- Koronabirusari aurre egiteko beharrezkoak ziren baliabide pribatu guztiak erabiltzea eta premiarik txikiena zeukaten eta pandemia transmititzeko arriskua areagotu zezaketen zerbitzuak atzeratzea ahalbidetu zuen martxoaren 24ko agindua. Modu horretan, erakunde pribatuek beren jarduera programatua hasi ahalko dute.
- Bizkai, Araba eta Gipuzkoaren esku zeuden baliabide guztiak (osasunari, kudeaketari eta boluntariotzari lotutakoak) kudeatu eta koordinatzea helburu zuen Zuzendaritza Batzordea ere bertan behera geratu da. Martxoaren 18an onartu zuten agindu hori.
- Hiletak egiteko debekua ere indargabetu dute. Arau hori martxoaren 26an onartu zuten.
- Nekazaritza eta abeltzaintzako elikagaiak eta produktuak zuzenean saltzeko azokak aldi baterako eteteko agindua ere bertan behera geratu da. Apirilaren 6an onartu zuten hori.
Indargabetze horiek Bizkai, Araba eta Gipuzkoan normaltasunera bueltatzeko egiten ari den “deskonfinamendu progresiboaren testuinguruan” kokatu behar direla jakinarazi dute. Hala ere, konpromiso eta erantzukizun indibidual eta kolektiboa eustearen garrantzia nabarmendu dute, beste behin ere. Ildo horretatik, atzo aurkeztu zuten koronabirusaren transmisioa saihesteko gomendioen gidaliburuan bildutako gomendioak zorrotz betetzeko deia luzatu dute.
