Gose greba hasi dute Ondarroan, Patxi Ruiz presoagaz elkartasunean
Herriko lau lagunek 15:00etan hasi dute protesta, eta bihar protestagaz beste zazpi lagunek bat egiteko asmoa dute. Herri mailan ere hainbat mobilizazio deitu dituzte.
Patxi Ruizen aldeko gose greba hasi duten herritarrak. Argazkia: Hitza Ondarroako lau herritarrek gose grebari ekin diote gaur [maiatzak 14] Patxi Ruiz euskal preso politikoari elkartasuna adierazteko. Jakitera eman dutenez, 15:00etan hasi dute protesta udaletxeko areto nagusian. “Kalean ibiltzeko dauzkagun ezintasunen ondorioz, protesta leku itxi batean egitea pentsatu dugu. Alarma egoera honetan mobilizatzea ez da batere erraza, baina presoek bizi duten egoera gogorraren aurrean ahal den neurrian kanpotik ere laguntza eman behar diegula argi ikusten dugu. Arrazoi honegatik herriko gazte batzuk batu eta gose greba hasi dugu”.
Udaletxean batu diren lau lagunek gaineratu dutenez, bihar [maiatzak 15] beste zazpi lagunek ere bat egingo dute protestagaz. “Beste lokal batean beste zazpi herritarrek batzeko asmoa dutela adierazi digute”. Gose greba 18:00etan hasiko dute.
Ruizek protestan jarraitzen duen bitartean jarrera hori mantentzeko borondatea dutela erakutsi dute.
“Beste hainbat tokitan ere gose grebak egiten ari dira, eta guk ere ekimenagaz bat egingo dugu”. Euskal preso politiko iruindarraren egoera konpontzen ez den artean gose grebari eutsiko diotela diote. “Inork gurekin protesta egin nahi baldin badu, jarri gurekin harremanetan”.
Ondarroako udaletxean gose greba egiten ari diren herritarrak. Argazkia: Hitza
Ruizek, hain zuzen, astelehenean [maiatzak 11] hasi zuen gose eta egarri greba, Murtzia II espetxean (Espainia) bizi izan dituen egoera eta zuzendaritzak eta funtzionarioek eginiko mehatxuengatik protesta egiteko. Ordutik, gose eta egarri grebari eusten dio presoak.
Herri modura ere erantzun beharra dagoela uste dute Ondarroan gose greba hasi dutenek. Hori dela eta, zapaturako [maiatzak 16] elkarretaratzeko deia egin dute. 20:00etan ipini dute hitzordua Alamedan, eta mobilizazioa segurtasun neurri zorrotzak bermatuta egiteko asmoa agertu dute. “Herritarrak mobilizazioan parte hartzera animatzen ditugu”. Bestelako kanpaina bat ere abiarazi dute ondarrutarrek. Kartzelako zuzendaritzari mezu bidalketa masibo bat egitea proposatu dute. “Mezuak Fax bidez bidaltzeko asmoa dugu; Zurrumurru liburu dendatik egongo da horretarako aukera. Zuzendaritzaren telefonoa mezuz betetzea da ekimen honen helburua”.
