Maiatzaren 25era atzeratu du Jaurlaritzak eskolen irekiera
Hasieran maiatzaren 18an ezarri zuen eskolak irekitzeko eguna, baina azkenean atzera egin eta astebete atzeratu du. Denis Itxasok atzo esan zuen lehenengo fasean ezin direla eskolak ireki. Esan zuenez, Jaurlaritzak ezin ditu Espainiako Gobernuak ezarritako arauak arindu, baina bai zorroztu.
Hasieran hezkuntzako jarduera maiatzaren 18an hastea nahi bazuen ere, hasierako data hori astebete atzeratzea erabaki du orain Jaurlaritzak. Beraz, datorren maiatzaren 25etik aurrera hasiko dira eskolak irekitzen. Borondatezkoa izango da irekiera hori eta eskola bakoitzak hartu beharko du erabakia.
Gaur [maiatzak 14] eman du erabakiaren berri Josu Erkoreka Eusko Jaurlaritzako Bozeramaileak: “Eskola komunitatean arazo gehiago ez sortzearren, argitasuna eta segurtasuna emateko helburuarekin, eta kontuan hartuta oraindik ez dugula Madrildik jaso zehazketa juridikoa, erabaki dugu maiatzaren 25ean hasiko dela eskoletara itzultzeko dinamika guztia”.
Denis Itxaso: “Lehenengo fasean eskolekiko esaten den gauza bakarra da irekitzea, desinfektatzea, garbitzea eta prestatzea dela posible, baina ez eskoletako gelak ireki eta bertan haurrak sartzea“
Cristina Uriarte Hezkutza Sailburuak gutun bat helarazi du ikastetxeetara, erabakiaren berri emateko. Bertan jasotzen denez, Eusko Jaurlaritzako Hezkuntza Saila joan den zapatuan [maiatzak 9] Espainiako Gobernuak onartutako proposamen bat lantzen aritu da Arabako, Bizkaiko eta Gipuzkoako hezkuntza eragileekin. Oharrak zehazten du Eusko Jaurlaritzak, proposamena onartzeaz gain, Espainiako Gobernuaren aldetik haren arautze juridikoa behar duela, estaldura juridikoa, akordioa aplikatzeko. «Eusko Jaurlaritzak, une honetara iritsita eta Espainiako Gobernuak oraindik hartu ez duen erabaki horren zain, ez du hezkuntza komunitatea tentsioan eta zain eduki nahi datozen egunotan, ezta Hezkuntza Saila egiten ari den elkarrizketa prozesuan maiatzaren 18rako geletara itzultzeko prest dauden hezkuntza sareak ere». Horrenbestez, Hezkuntza Sailak ziurtatu du eragileekin lanean jarraituko duela hurrengo egunetan eta datorren astean, maiatzaren 25ean ikasgeletara itzuli daitezen lehen aurreikusitako mailetako ikasleak.
Denis Itxaso Espainiako Gobernuak EAEn duen ordezkariak mezu argia bidali zion Jaurlaritzari: “Lehenengo fasean eskolekiko esaten den gauza bakarra da irekitzea, desinfektatzea, garbitzea eta prestatzea dela posible, baina ez eskoletako gelak ireki eta bertan haurrak sartzea”. Haren hitzetan, hori “azkarregi joatea” zen, eta printzipioz ez zegoen lehenengo fasearen aukeren artean. Itxasok nabarmendu zuen arintze prozesuan baldintza zorrotzagoak jarri nahi badira, ez dagoela arazorik; bai, ordea, arintze prozesua “gehiegi azeleratu” nahi duten neurriei buruz hitz egitean.
