Erabilera bakarreko eskularruekin arreta berezia edukitzeko eskatu du Ondarroako Udalak
Azkenaldian latexko eskularru kopuru handia agertu da Ondarroako Arrigorri hondartzan. Eskularruak zakarrontzietara bota behar direla gogorarazi dute.
Arrigorri hondartzan agertutako eskularruak. Argazkia: Ondarroako Udala Ondarroako Udala kexu agertu da azken egunetan Arrigorri hondartzan agertu den hondakin kopuruagaz; bereziki latexko eskularruak agertu dira ur hegalean, eta gertaera horregaz kezkatuta agertu dira agintariak. Udal iturrien esanetan, eskularru horietako asko ez dira zuzenean Arrigorri hondartzan bertan botatakoak. Hala ere, herritarrei erabilitako eskularruak zakarrontzietara botatzeko dei egin die. “Eskularruak lurrera botaz gero hondartzan, errekan, itsasoan edo edozein berdegunetan amaitzen dute”, ohartarazi dute.
Gaiagaz kezkatuta Zunbeltz Bedialauneta Ibaibarriaga alkateak mezu zuzena bidali nahi izan die herritarrei. “Gure herria, ingurumena eta osasuna guk zaindu behar ditugu”. Osasun krisia dela eta, azken hilabeteotan asko areagotu da eskularruen erabilera, baina udalak gogorarazi du norberak eduki behar duela bere eskularruen ardura, eta horiek erabilitakoan oso garrantzitsua dela lurrera ez botatzea. “Alde batetik, ingurumenean egiten duten kaltea dago, baina horrez gain, eskularru horiek (hondartzan agertutakoak edo kalean agertu daitezkeenak) gaitzen bat transmititzeko bitartekoak izan daitezke, eta garbitzaileek nahiz eta segurtasun neurriekin lan egin, ez dute zertan euren burua arriskuan ipini batzuek hondakinak zakarrontzira botatzen ez dituztelako”.
Udalak, gainera, eskari zuzena egin die bezeroarentzako eskularruak denda kanpoan ipintzen dituzten merkatariei. “Egun haizetsuetan bereziki kontuz ibiltzeko eskatzen diegu; haize boladekin errekan amaitu dezaketen eskularruak asko izan daitezke eta”.
Bideoa ezagutzera eman orduko, hautsak harrotu ditu han-hemenka. Eguzkik, esaterako, egoera salatu nahi izan zuen bideoa zabaldu zen egunean bertan. “Auskalo zenbat material sanitario dagoen gure itsaso eta erreketan”, azpimarratu zuten. Talde ekologistako kideek gaineratu zutenez, egunotan euri asko egin du, eta euren ustez, horregatik agertu da hainbat material hondartzan.
Eguzkik hausnarketarako deia egin zuen, eta herritarrei arduraz jokatzeko eskatu zien. Bide batez, inguruko udalerrietako arduradunei ere eskua sartzeko eta laguntzeko eskatu zien. “Herritarrei euren zaborrekin arduratzeko deialdi berezia egitea beharrezkoa dela uste dugu, batez ere egunotan bizi dugun egoeran”.
