Patxi Ruizen aldeko txandakako baraualdia hasi dute Ondarroan
Herriko hamabi lagunek hasitako gose grebari amaiera eman ostean, 48 orduko iraupena izango duten txandakako baraualdiak egingo dituzte hamabost bat lagunek.
Patxi Ruiz presoaren aldeko elkarretaratzea, gaur goizean, Ondarroako Alamedan Gose eta egarri greban dagoen Patxi Ruiz euskal preso politikoari elkartasuna adierazteko txandakako baraualdiari ekin diote Ondarroako lokal batean. Baraualdiaren antolatzaileek jakitera eman dutenez, azken egunotan herriko hamabi lagun egon dira gose greban, eta orain, ostera, 48 orduko iraupena duten txandakako baraualdiak egingo dituzte.
Gaur [maiatzak 18] 11:30ean hamabost bat lagunek eman diote hasiera ekimenari; sei lagun hasi dira lehen txandan. Ruizek protestan jarraitzen duen bitartean eta egoera konpontzen ez den artean protestari eutsiko diotela adierazi dute. “Patxiren egoera aldatzen ez den bitartean gure mobilizazioa txandako 48 orduko baraualdietan oinarrituko da. Txandakako baraualdian parte hartzera animatzen bazarete gugaz harremanetan ipini! Hau denon borroka da; animatu eta parte hartu!”.
Protestekin eguen [maiatzak 14] eguerdian hasi ziren Ondarroan. Lau gaztek Ruizen aldeko gose greba bat hasi zuten udaletxeko areto nagusian. “Helburua Patxiren egoerari herrian oihartzuna ematea zen, eta bere egoera aldatzeko eskatzeko mobilizazioak martxan ipintzea”. Herriko beste zortzi gaztek ere gose greba hasi zuten bariku [maiatzak 15] arratsaldean, beste lokal batean. Aurreikusitako lehen helburuak bete zirela ikusi ostera, udaletxeko areto nagusiko ekintza amaitutzat eman zuten zapatu [maiatzak 16] gauean. Beste lokalean protestak egon diren zortziek, berriz, gaur goizean amaitu dute protesta.
Baraualdiaz gain, bestelako ekintzak ere egin dituzte Ondarroan. Zapatutik [maiatzak 16] hasita, esaterako, egunero elkarretaratzeak egin dituzte Alamedan. Lehen protestak eduki zuen erantzuna ikusita, egunero 20 minutuko bi elkarretaratze egiten dituzte: bata, 11:30ean eta, bestea, 20:00etan. Goizean egin dute azken mobilizazioa alarma egoerak ezartzen dituen bi metroko distantzia beteta, eta bertan agertu dutenez, zortzi egun gose eta egarri greban daramatzan presoaren egoera gero eta larriagoa da.
Eguenean abian ipinitako fax bidalketa masiboak ere aurrera jarraitzen duela gaineratu dute. “Lagundu nahi duzuenok pasa Zurrumurru liburudendatik”. Azaldu dutenez, 200 mezu baino gehiago bidali dituzte Murtzia IIko (Espainia) espetxe zuzendaritzara. “Faxa arazoak ematen hasi da. Dirudienez, kartzelako faxa itzalita dago, baina mezuak bidaltzen jarraitzeko deia bere horretan mantentzen dugu. Faxa piztutzen dutenean mezu denak jasoko dituztela uste dugu”. Aurrera begira mobilizazio gehiago antolatzeko asmoa agertu du taldeak. “Planteatzen joango garen mobilizazioetan jendea parte hartzera animatu nahi dugu. Orain arte egin ditugunek erantzun oso ona eduki dute. Eskerrik asko parte hartu duten herritar guztiei”.
